SU GIASSU
Domo
Ite est Diariulimba
Sa gerèntzia de Diariulimba
Su Sòtziu Limba Sarda
Organigramma de su Sòtziu
LINKS
ARCHIVIU annu pro annu 
Pro retzire sa lìtera de noas
ISCRIENOS
diariulimba@sotziulimbasarda.net



Diretore: -       Coord.Editoriale: Micheli Ladu
CHISTIONES

01/09/2008 
Lamentos e pensamentos subra de su sardu
[de Antonella Licheri]

In custos ùrtimos duos meses apo lègidu totu sos artìculos chi ant iscritu dae Bolognesi a Becciu e gasi sighende, sigo a pensare e pensare e non resurto a nche ispistiddire custa cosa de sa gente chi sighit a s'impuntare contra a su sardu, (est comente chi deo porte una pedra manna a intro de s'istògomo) mancu chi sa limba lis apat bogadu sos ogros! De siguru Bolognesi at nadu sa veridade custos bellos signores e signoras acadèmicos su sardu non lu chistionant totu cantos e sino' proite tanta gherra e tanta pelea impuntendesi a mala bògia contra a su sardu? Si la devo nàrrere totu seo meda demoralizada, a sa fine mancari bi siant tantos a favore, sa limba istentat a intrare a boghe prena in totu sos àmbitos, ma custu bilinguismu bi la faghimus a lu fàghere o nono? S'iscopu diat devet èssere cussu.......


Su 28 de trìulas sa diretritze de s'ufìtziu provintziale de Nùgoro at convocadu totu sos operadores de sa provìntzia, s'est faeddadu de comente si sunt ponende sas cosas, s'est faeddadu de su pranu triennale, a tando galu non si nde ischiat nudda. S'est finas faeddadu de sa lege chi Soru nos aiat promissu a Casteddu, s'idea nostra fit de nos presentare a Casteddu, sos tempos sunt mudande e gasi sa gente e gasi sa limba, non faeddo de dies ma de meses, cada mese chi colat est unu in mancu, bos at a pàrrere unu machine ma pensade unu pagu ite si diat pòdere fàghere in unu mese pro sa limba si bi esserat cuncòrdia, unione e organizatzione. A sa fine iscridimus, iscridimus e torramus a iscrìere: semper unu contra a s'àteru e passande nos la de palas in coddos., arratza de bellesa! 

Deo forsis seo tropu idealista mi diant a pràghere sas cosas bene fatas, craras e cristallinas ma a dolu mannu no est semper gasi, bastet de pensare a totu su morigoriu chi aiat fatu sa finantziària noa, a bos amentades totu sa polemica chi s'est fata in sos primos meses de custu annu? Bi fint paritzos operadores in abbas malas, pariat chi non si nde bogaiat atzola, posca a bellu a bellu sas cosas sunt torradas impare. Comente semper chentu concas chentu berritas e calicunu at fatu comente at chèrfidu, e duncas a mancat una linea coerente o nono? Subra de sos isportellos nde apo intesu de cada genia, in sustàntzia chie bi traballat diat devet nessi chistionare su sardu e ischire iscrìere e siguramente diat devet èssere una pessona cun una cussèntzia identitària manna, custa pessona diat devet amparare, divulgare e promòvere su sardu. Cada annu sas oras sunt prus pagas pro nois operadores e pensare chi b'a t gente chi pensat chi tenimus "betze" istipendione, oi Signore chi si nde apenet de nois!!!


Deo dia èssere meda cuntenta si prima o posca nos torremus a addoviare in Casteddu, si dae sa Regione partat carchi àndala o mègius si nos diant a marcare una caminera chi siat sa matessi pro totu cantos. A su chi narat su pranu triennale su sardu intrat in sas iscolas, seo curiosa de bìdere ite nde at a bessire a fora.
Duncas faeddo a nùmene de totu sos operadores chi de a beru intendent sa limba in su coro, pro praghere non mi nde fatzais una curpa, a chie de cumpetèntzia naro: a nos bidimus in Casteddu o nono? Nois bi semus.
Dae Duarche Antonella Licheri

 

 



 
 
 

 

 
diariulimba@sotziulimbasarda.net  © sotziulimbasarda 2004-2008,"e' vietato riprodurre articoli originali o estratti da questo sito senza l'assenso della direzione"