Artìgulu ki s'U.S. m'adi pubrigau su 29/05/2005 sa diri in fatu a sa "Diri
de sa Sardìnnia".
Eriseru esti bessiu cun s'Unioni su CD de "Su patriottu sardu a sos
feudatarios" deu in classi mia in sa III E de s'Alberghieru de Pauli apu
ghetau su bandu po i custu traballu de is cantadoris de Neoneli ki càtanta
cun àterus artistas cuntinentalis. Custa cantzoni ca esti castiada,
ascurtada casi cumenti ki fèssidi una ispetzia de Innu natzionali mancau de sa Natzioni
sarda mancada. Esti sa cantzoni prus cannota e prus ascurtada de s'istòria
de sa curtura sarda. E béndidi e meda oi in diri puru a pusti de prus de
duxent'annus. Creeis ca oi béndidi o esti prus ligiu de "Procurai de moderai" ki esti stétiu iscritu in s'acabu de su 1794, una matessi opera
poétiga de su cudhu tempus "Il giorno" de su Parini? Nossinnioras. Ita bellu
in Pirri in su 1980, "Su patriottu sardu a sos feudatarios" sonau e
cantau, pagu cantau e meda sonau de su Cantzonieri de su Làtziu, bénnius in
Sardìnnia a pustis a essi traballau cun is musicas Afriganas, s'imprus
percussionis. Femus in casi duxentus cun is manus pigadas badhendi un'
ispétzia de badhu tundu, ma internatzionali.
Su fuedhu "Patriottu" cun duas /tt/, est'istétiu circau de mei cun un'àtera
professorissa, in su Fuedhariu Istòrigu de sa Limba Italliana, cudhu
incumentzau de S. Battaglia e acabau, cun una surra de volùminus, de pagu e
apustis essi mortu su kini dh'adi cumentzau. In custu traballu prus mannu e
sistemàtigu a pitzus de sa lìngua Italliana su fuedhu patriottu cun duas
/tt/ esti nau arraru e poétigu; fintzas custa kistioni dha nàrada longa
meda ca s'imperai un'arregistu limbìstigu artu esti e fìada a poita custu
discursu depìada essi bodhiu, ellus, de su pòpulu, ma po dhu fai lompi a is
mèris de su sistema feudali is Varonis, ca custu sistema sotziali no si
bolìada, intzaras, iscuncodrai ma scéti moderai e nd'aterrai sos malos usos.
Su matessi su Parini, in Milanu, pigada in brullas sa martzei su
Sannoricu, givunedhu, ma fiada issu puru po moderai is istrùpius de su feudalesimu e no
po ndi dh'iscusciai.
Ma torraus a su CD ki tenemu giai de tres annus arregistrau in cascita e
dh'emu imperau po fai unu mòdulu de Itallianu in s'iscola "D. A.
Azuni" de Bidheputzu in IV in s'annu iscolàstigu 2001/2002, aintru de su progamu de
cudh'annu de Itallianu.
Emu giai sighiu po duas bortas s'esàmini de linguìstiga sarda cun sa
professorissa A. Detori, una borta in s'unibersidadi de Castedhu e s'àtera
in s'iscola de ispetzialitzazioni po professoris a sa SISS. Issa adi fatu
s'istùdiu ca adi torrau a pigai po su traballu istòrigu su professori L.
Carta, a oi su prus mannu spertu a pitzus de is "Tres annus
arrivolutzionarius".
Sa bellesa de sa mùsiga, e de is fuedhus dhus cannosceus casi totus o
assumancu dhus eus inténdius totus in Sardìnnia, e de sa performaces de is
artista Sardus e cuntinentalis esti meda manna. "Procurai e moderai" bénidi
cantau in cuatru maneras a gosos, a sa cossigana, a tenori e esti fintzas
arresau kene mùsiga e aici si podidi fai biri ca sa poesia esti filla de
sa mùsiga e de sa cantzoni. Intendi a Branduardi carinniendi cun sa boxi is
fuedhus nostus, o Guccini ca pàridi tèngada sa buca prena de fai sicada e
narada procurate cun /te/ e non /de/, o sa boxi de arivolutzionariu de
Ligabue ca paridi ki tòrridi su feli de i cussas diis, o cudha boxi arrisulana de Elliedhu, insomma unu boboi de no perdi.
Sa Sarda Arrivolutzioni est'istétia, issa scéti in Oropa, una cosa sketa
sarda e kene s'agiudu de is frantzesus ca custus isponsoritzanta is
moimentus contras a is Monarkias assolutistas. Antzis cumenti scieus esti
cumentzada pretzisu contras a is frantzesus e adi sighiu cun is ancas suas.
E s'istòria de sa literadura de su Salinari-Ricci adi postu custa cantzoni a
primitziu de su volùminu de literadura noa Italliana. Su Vettori in
s'arregorta de sa cantzoni populari, pulìtiga, faidi oberri custu traballu
cun "Procurai e moderai", custu po si fai cumprendi cantu sìada e esti
importanti meda custa cantzoni in s'istòria de sa Sardìnnia e cantu sìada
noa sa lìngua imperada de su Mannu e de s'élite dimugràtiga sarda si
nd'acatus in is fuedhus pigaus a manus prenas de su léssigu pulìtigu
arrennovadori imperau e esportau, verba volant, de s'arrivolutzioni
frantzesa.
Po biri e ligi diretamenti pigai:
M.A. Detori, "Su patriottu sardu a sos feudatarios" de Frantziscu Niatziu
Mannu, bogau de Arkiviu Sardu de su moimentu operaiu, messaiu e otonomìstigu, cuadernu 32/34, editrixi Sardìnnia, Castedhu 1990 .
L. Carta, 1794-1998, De s'obrescidroxu de s'otonamia a s'arriforma federalista de s'Istadu. Castedhu, Palatu Vissurrei, 28 Arbili 1998. Regioni
Otonoma de sa Sardìnnia.
Artìgulu ki s?U. S. no m'adi pubrigau e si dh'emu ispediu duas diis innantis
a s'artìgulu a pitzus "Su patriottu sardu a sos feudatarios".
Eriseu a Macumere seu andau po ispatinai casi cincuxentus "Cartas Istòrigas
e Limbìstigas de Sardìnnia", a totu is ki atobiamus abisitendi s'amostu de
is lìburus. Femu cun Pepi Pili, un'àteru professori cumenti a mei, deu seu a
s'Antoni Gramsci de Pauli, ki esti abetendi sa pubricatzioni de su fuedhariu
fatu de issu, fuedhariu setorialli, de is partis de su corpus de is ominis.
Femu cirkendi su traballu prentadorgiu de s'Ilisso bessiu a Gennaxu
de su 2005 de "Po cantu Bidhanoa", ma custus amostadoris de is lìburus desa Sardìnnia no ndi tenianta manc'unu. Apu biu ca tenìanta duus lìburus
de "Po cantu Bidhanoa" ma fianta de s'editzioni becia de sa 2D Mediterranea,
Castedhu-Tàtari 1987, lìburu de aundi apu pigau is ainas po fai sa tesixedha
de acabu in su Maistraxu de segundu livellu de "Lìngua, Curtura e Istòria de
Sardìnnia" in s'Unibersidadi castedhaia, scéti ca su béciu costada 16,00 €,
su nou de s'Ilisso 11,00 €.
S'annu passau apu arregalau a unu bixinu de mei ki bivu in su bixinau de
"Is Cancelledhus" in Pauli, po candu custu ìada fatu is annus, su liburedhu de
su "Partidu Cumunista de Sardìnnia", prentau in su 1948, costada 5,
cincu, francus.
Custu liburedhu nci dhu fìanta fuliendi e esti arribau a mei scéti po bona
sorti. Issu tenìada su progamu de su partidu e nci fianta fintzas prentaus
su Manifestu de Marx-Engels e is tesis de unu cungressu de su P.C.URSS.
Sa bellesa de i custu liburedhu esti ca fuedhada de indipendéntzia e de
lìngua e curtura de Sardìnnia, aintru a unu progetu pulìtigu. Fìada a pitzus
de i custu lìburu e de i custa organitzatzioni ki emu bofiu fai sa tesi de
laurea po fai una circa de cumenti esti andada a acabai totu cust'istòria
Comunista e Indipendentista de Sardìnnia. Custu esti istétiu sculau,
sciusciau de su béciu PCI, cun promòvius e iscrocorigaus in sa carrera
pulìtiga.
Sikè m'esti arrutu de depi fai sa tesi de Lìteras, in Istòria de Sardìnnia,
cun L. Ortu, de no cunfundi cun G. Ortu ki esti in Iscèntzias Pulìtigas, a
pitzus de su "Currieri de Sardìnnia" su giorronali fundau de su forresu G.B.
Tuveri ca po primu in Sardìnnia fuèdhada de "Kistioni Sarda". Custu,
miu, professori ìada pubrigau a pitzus de su Sardu-Fascismu unu lìburu ki
s'adi donau, poita si dhapu pregontau, de ligi e istudiai po s'esàmini de fai cun
issu. Custu traballu ténidi meda intervistas fatas cun Paulu Pili su dirigenti sardista ca fìada brintau in su fascismu po dhu cunditzionai
"sardistigamenti", su ki ìada cuncodrau sa benda de su casu sardu, scéti de
nòmini "arromanu", diretamenti in is mercaus ameriganus, fundendi sa FEDLAC
po is berbecargiu, sa SYLOS po is massargius, e aterus assotzius, cosas ki
ìanta fintzas funtzionau. Iada arrennesciu a fai bessiri sa lei de su
Milliardu, lei torrada a pigai in tempus prus nous cun is "Piani di
Rinascita" de is annus 1970 e àteras...
Apu fatu sa tesixedha de su Maistraxu a pitzus de Venutu Lobina e de
s'arrumanzu "Po cantu Bidhanoa", no scéti poita esti unu lìburu de sentidu
universalli, prenu de poesia, atrivimentu, ispantu, prexu,
sensualidadi, maxia, guetus limbistigus, de su prus mannu literadu sardu po is arroris
fatus a s'iscura terra nosta, ma poita VENUTU SI CO'NTADA DE SU
SARDU-FASCISMU, de unu ki dh'adi bìviu de aintru, esti in custu sa mellus
parti de esssi arrumanzu istòrigu.
Si còntada de Milliedhu Lussu, de Paulu Pili, de su generalli A.Gandolfo su
ki adi fatu sa tratativa po si ndi pigai is sardisatas aintru de su
fascismu, de O. Dinale su prefetu de Nùgoro. Si contada de s'avolotu de totu
sa bidha contras, sutzèdiu diaderus, a s'aministratzioni cumunali in s'interi de su fascismu, sa cundenna de Sintzula a su cunfinu. "Po cantu
Bidhanoa" esti su biaxu longu, sunfriu, alluinau, de un'òmini, de una
famillia[cudha de Luisicu], de una bidha[Bidhanoa], de una natzioni[sa
nosta], brintada in e iscramentada de su fasci[aici dhu tzérriada Venutu].
Issu ki fìada andau de bonolla a conkistai, ma intzaras si narada
civillitzai, s'Afriga e ca in acabu de s'arrumazu narada "su tontu" a su
fillu Milliedhu, su prus istimau de is tres ki ndi teniada, ki fìada patiu
de bonolla in sa segunda guerra mundialli e fudi mortu istrecau de unu
carr'armau ingresu.
Cantu depeus abetai e torrai a sumportai po sighiri a ndi bessiri de
s'imburdimentu de sa cuscèntzia nosta?
Po kini bòlidi agatai e ligi custas pubrigatzionis:
Su "Sardufascismu" in is paperis de Paulu Pili. Agiudu po un'istòria de sa
kistioni sarda. de L. Ortu, bogau de ARKI'VIU ISTO'RIGU SARDU, Volùminu XXXVI, Castedhu 1989.
Su Partidu Comunista de Sardìnnia (P.C.S.), Presentatzioni, Progamu de su
P.C.S.; C. Marx e F. Engels: Manifestu de is Cumunistas 1848;
pubricatzioni de su 1948.
