© LimbaSarda 2004

 

 

 

 

 

 

 

 

 

 

15/11/2004 S'atobiu in sa bidda de su Guilcieri est resessiu bene

Sa Limba de Mesania "colat" in Sèdilo

No est andau male s'atobiu chi s'est cuncordau sabadu colau in Sèdilo cun su Sotziu Archeologicu Iloi. Antzis, abbellu abbellu cussu chi pariat unu cunvenniu comente àteros milli, s'est mudau agiumai in d'una ocasione de "autocuscentzia", comente at nadu calencunu. Intantu ddue at de nàrrere ca su metudu de sa proposta "Limba de Mesania" colat, e colat in totue. Fortzis, sa proposta tennica at bisongiu galu de èssere acontzada mengius, ma su chi est de importu est chi sos sardos, in cada logu de Campidanu o de Cabu de Susu, s'atobiant a pare e resessent a faeddare de argumentos tostaos comente s'unificatzione e s'istandardizatzione sena brigare. Est lestru a nàrrere su chi praghet e su chi non praghet. Non praghet s'idea de un'ùnica limba sarda, siat LSU o LdM, fortzis ca sos tempos non sunt cumprios, o fortzis chi sos dannos fatos cun su mètudu impreau pro aprontare e presentare sa Limba Sarda Unificada (arrogantzia, prepotentzia, personalismu  esasperau) ant comente iscaddau sa zente. Praghet su disigiu de resonare, sa trancuillidade,  sa mancantzia de interessu. Praghet s'idea de pònnere sos sardos a cumone sena agualare sas diferentzias, chi sun su sale de s'identidade sarda. Ddue at de sìghire a andare a furriu, intèndere sos sardos. Ddue at de fàghere su triballu chi iat aere depiu faghere sa Regione, ma chi non faghet. 
Ddue at de resonare meda galu. Est làdinu chi una limba amministrativa istandardizada servit a  totu sos sardos. Ma fintzas a cando sos sardos non dd'ant a cùmprendere, est debbadas a fortzare sos tempos. Abbellu abbellu dd'aus a cumprèndere totu paris. Intantu peroe, sa proposta alternartiva a sa LSU est balangiando su resurtau suo: istabbilire cuntatos cun sos sardos e pònnere sas paghes pro triballare pro sa limba in unidade. Ant faeddadu totus in Sèdilo, giovanos e betzos. E totus cun d'ùnica punna: afortiare sa limba sarda. 

A segus