28/11/2004 Cunvenniu in Casteddu de sa Fundatzione Sardinia
Màriu Melis: unu simple capu de istadu
Sa cosa prus de capia dd’at narada Renato Soru, chi como est a ghia de s’esecutivu regionale: <Mariu Melis at fatu su presidente de sa Giunta comente chi esset faghende su Capu de unu Istadu>. A bisu de medas est istau unu avvenimentu mannu su cunvenniu aparitzau dae sa Fondatzione Sardinia eris in Casteddu pro ammentare s’òpera, sas ideas e sa fìgura de s’òmine polìticu sardista mancau pagu tempus a oe. In sa sala de su Cis in viale Diaz si sunt giaos apuntamentu polìticos, intellettuales, giornalistas, militantes, sotzios e simples curiosos. Ant foeddau Vindice Ribichesu, pro sos aparitzadores, Emiliu Floris, Renato Soru, Manuele Sanna, Bachis Bandinu, Francoise Simoni, Giacomo Sanna, Càralu Mannoni, Giorgi Maciotta e Antoni Melis, su figiu.
Totus de acordu in su nàrrere chi s’istatista de Ulìana est una figura manna de s’istòria polìtica reghente de s’ìsula. At tentu incarrigos medas e totus de importu: sìndigu, assessore regionale, presidente, deputau e cumponente de su Parlamentu Europeu. Triballos sèmpere cumprios cun onore, cumpetentzia e dignidade.
S’isperientzia chi prus s’arregodat est cussa de ghia de s’esecutivu regionale pro chimbe annos dae su 1984 a su 1989, cando su bentu sardista si nche fut pesau a forte e iat fatu bisare mannos e pitzinnos. Posca, sos annos de su declinu, po unu partidu chi galu oe est in chirca de un’alenu po si nche torrare in pè.
Non totu su chi at cuntessiu a Melis, comente eredidade polìtica est positivu, ma est ormai argumentu de istùdios po sos istòricos. Una ferta chi est sèmpere aberta est cussa de comente in chimbe annos de guvernu sardista non si fut arresessiu a faghere una lege po sa limba e sa cultura sarda chi amus tentu, posca, in su 1997 ebbia. E de comente sa teòria de su “sardismu difusu” apat fatu balangiare a totus, foras che a is partidos sardistas, natzionalitarios e natzionalistas.
S’istòria fut pòtzida andare diversamente.
Ma siat comente si siat, Mariu Melis, in su bene e in su male, faghet parte de s’istòria de totu sos sardos mancari Ciriaco De Mita, cando s’ulianesu depiat bessire a èssere presidente, iat nadu chi faghiat parte de unu partidu de “mezzoterroristi”.
Imbetzes, Mariu Melis, cun totu is difetos de su naturale suo, dd’iat àere pòtziu giare una letzione de dignidade istitutzionale. Comente si narat a s’italiana: <Su grabbu no est abba frisca>.
