|
|
Diretore: -
Coord.Editoriale: Micheli Ladu |
|
CHISTIONES |
|
|
29/05/2008
Eletziones regionales in sa Badde de Aosta: binchent sos autonomistas
|
Sas eletziones de su 25 de maju coladu in sa Regione Autònoma de sa Badde de Aosta ant bidu sa bìnchida de sas fortzas autonomistas chi ant leadu in totu su 61,5% de sos votos. Difatis Union Valdotaine, Federation Autonomiste e Stella Alpina ant otènnidu 45.520. Sos partidos mannos che a su Pdl e Pd ant pigadu su primu su 10,6% e s’àteru 9,3%.
Sa coalitzione autonomista chi aiat giai guvernadu in sa legislatzione colada at duncas bintu cun una majoria làdina. Unu cunsensu chi balet 23 sègios in su consìgiu regionale nou: de custos s’Union Valdotaine otenet 17 sègios gàtzias a sos 32.614 votos (su 44,38%) cun sos faeddos “Gouverner les changements”; sa Stella Alpina 4 sègios cun 8.370 votos (11,39%) e sa Federation Autonomiste 2 sègios cun 4.536 (6,17%).
Sa cumpetitzione eletorale l’ant fata cun règulas noas cunforma a cussa de su 2003. Su sistema proportzionale cun lìmite est istadu curretu cun sa possibilidade pro prus listas de formare una coalitzione e cun unu prèmiu de majoria (21 sègios de 35) a chie nche colat su 50% de sos votos vàlidos. Ùnicu casu in totu Itàlia, non b’at s’eletzione direta de su Presidente de sa Regione, chi l’at a nominare su Consìgiu regionale.
In sa Regione de sa Badde de Aosta, in prus de sas limbas italiana e frantzesa b’ant fintzas su sa faeddada calabresa de San Giorgio, su piemontesu, su walser e sa faeddada francuproventzale patois. Pro custa ùrtima sa Regione e su Bureau régional éducation linguistique (Brel), ant istituidu bator isportellos linguìsticos. Dae su 2007 est operativu in sa tzitade de Aosta etotu s’isportellu tzentralizadu collegadu a manera telemàtica cun sas sedes de sas Comunidades montanas Grand-Combin, a Gignod, Grand-Paradis (Villeneuve) e Mont-Emilius (Quart).
|
|
|