Su 7 de Triulas so andada a Silicua pro iscultare sa letzione de su prof. Bolognesi ca, sende finas mastra de limba sarda, dae issu, chi ap'apidu su piaghere de lu leger ma finas de l'intender de pessone nessi atteras duas boltas, nde cheriat leare connoschentzias e medios noos de poder impreare cun sos pitzinnos de iscola. Como, no so a postu de conca deo, ca m'apo fattu valuta de 200 chilometres pro andare a iscultare su chi prof. Bolognesi podet narrer a sos mastros de limba sarda, ma sos mastros de Silicua no si la passan mezus meda bidu chi, cun d unu caldu che in gianna de furru e in su tempus chi, comente totu ischin, sos mastros che sun a pes a modde in mare o iffrischendesi in montagna, finas issos sun setzidos in d unu bancu sighende una letzione de fonologia de sa limba sarda in sardu.

Su chi deo nd'apo leadu in cussa letzione m'at cuffrimmadu s'iscentzia de prof. Bolognesi, cussa e totu chi aio iscumproadu in sos iscrittos suos. Sos mastros de Silicua (e bi nde aiat finas calcunu chi ocannu s'est giubiladu) fin fattende cussa letzione ca no lis fin bastadas sas atteras duas chi su professore lis aiat fattu intro de s'annu. In pagas peraulas: no aian ischeddadu. Su sero so recuida a bidda pius abbedida meda de cando aia movidu su manzanu, chito meda, ca fit sa die de Santu 'Antine. Sigo sempre, comente poto, totu su chi si faghet in limba pro sa limba e torro a narrer su chi sempre naro: ma no est mezus, pius a prestu che a istare faeddende, de si ponner a fainare? E si no apo gana de la fagher una cosa o si no bi so bona a la fagher, no est mezus de la lassare fagher a chie l'est fattende?

Sa limba la faghet chie faeddat (-A dolu mannu-, naro deo chi so mastra de materias literarias). E tando, b'at de lu timire unu standard? Pesso deaberu de non, finas ca su standard no est sa limba chi niune nos at a ponner in bucca ma at a esser su sinnu pro nos aunire. Si cun passientzia si iscultat su chi at de narrer prof. Bolognesi, chie la est timende at a bider chi sa Limba Sarda Comuna est una limba chi esistit, sa de su Guilcer, e chi chie ischit faeddare in sardu, Cabususesu o Maurreddinu chi siat, chena mancare la cumprendet, si iscultat. Si niune at un'attera preposta, sa faina imbinzada cheret cumprida. In Piaghe naramus chi chie andat a caddu est sugetu a nde ruer e finas chi in caminu s'accontzat barriu.

Saludos
Vanna Ledda de Piaghe, mastra de materias literarias e de limba sarda
in sas medias de Fiolinas