SU GIASSU
Domo
Ite est Diariulimba
Sa gerèntzia de Diariulimba
Su Sòtziu Limba Sarda
Organigramma de su Sòtziu
LINKS
ARCHIVIU annu pro annu 
Pro retzire sa lìtera de noas
ISCRIENOS
diariulimba@sotziulimbasarda.net



Diretore: -       Coord.Editoriale: Micheli Ladu
CHISTIONES

11/07/2008 
Non prus limba de bandidos ma de carabineris
Unu tempus su sardu fiat sa limba de sos bandidos. Oe paret chi non siat prus gasi. Proa nde siat chi pagu tempus a como, su generale cumandante de s'Arma de sos Carabineris, Carmine Adinolfi, at faeddadu in sardu in ocasiones ufitziales prus de una bia. Sinnu de comente sunt cambiende atinos e giudìtzios subra sa chistione de sa limba.

S'Arma, chi sos sardos connoschent bene dae tempos e tempòrios e chi ant contribuidu a fàghere manna cun generatziones intreas chi b�ant traballadu in intro, aiat giai imprentadu, a sa fine de s'annu coladu, su calendàriu ufitziale totu bortadu in limba sarda dae Luciano Carta. Finas sa die de sa presentada in Casteddu aiant faeddadu in sardu.

Chie est andadu, a custa e a àteras ocasiones, at naradu chi at fatu un'efetu bellu meda a intèndere unu generale de sos carabineris faeddende in sardu. Ma at fatu notare finas chi fiant in medas, intro sos ascurtadores sardos, sos chi faghiant sa cara tosta, o incrispaiant sos chìgios, o ridiant finas dende.si corpigheddos de cùbidu s'unu cun s'àteru. Ateros imbetzes fiant cuntentos mannos de intèndere unu generale de sos carabineris faeddende in sardu. Ateros galu mancu bi creiant a su chi intendiant.

Sinnu de su mudare de su tempus chi non pertcat àtera gente. Ma si nde abìgiant sos intelletuales "à la pàge" nostros? Bi cheret chi s'istadu aprovet una lege pro nàrrere chi su sardu est " una " limba e non duos, o bator o unu muntone de dialetos? Bi cheret chi s'istadu nàrgiat chi su sardu depet intrare in iscola o in s'amministratzione pùblica pro chi li pòngiant mente sos sardos? Bi cheret chi su generale de sos carabineris faeddet in sardu pro cumprèndere chi est agigu curiosu chi bi tenimus professores de filologia romanza, glotologia e literadura "sarda" chi mancu proant a lu faeddare?

Non faeddemus de proare a fàghere letziones veiculares o publicatziones in sardu"putzi putzi". Mègius ingiurgiare, frastimare e fàghere atacos personales. Gasi emmo chi amostramus de èssere òmines de cultura. Bellu assempru pro sos fìgios nostros.

Bi cheret sa proa controida de s'Arma chi faeddat in sardu pro cumprèndere chi est agigu curiosu a tènnere "espertos famados" de limba chi imparant bator limbas angenas, ma non s'isfortzant mai de imparare sa de sa terra issoro. B'at a chèrrere forsis chi faeddet in sardu, in antis o a pustis, su Presidente de sa Repùblica pro chi càmbiet carchi cosa?

De seguru custa proa puru, in antis o a pustis, no at a mancare.




 
 
 

 

 
diariulimba@sotziulimbasarda.net  © sotziulimbasarda 2004-2008,"e' vietato riprodurre articoli originali o estratti da questo sito senza l'assenso della direzione"