Saludi a totus!Emu a cherrer nàrrerre deu puru duus fueddus suba de sa chistioni de sa LSU. Deu seu feti unu poeta e tradusidori ch'iscriet in sardu,italianu,spagnolu e inglesu e calincuna borta in frantzesu puru e apu sempri tribagliadu de imparadori,a prima in sa scola elementari e a pustis,de su 2002 a oi ddu fatzu, sempri po is iscolas,perou de dogna mannària e comente maistu de scritura cun is progetus finantziaus de sa 26 de sa regioni sarda e de sa 482 de su guvernu natzionali.

Faghende custu apu tribagliadu in medas partis de Sardigna,e no apu mai tentu problemas a cumprèndere e a mi fagher cumprèndere,puru poita apu sempri intesu faveddare sas duas variantes printzipales,ca babbu meu e is aiaius po parti sua e puru is bisaius de mama faveddaiant in sa limba de cabu de susu e mama e sa famìlia sua in sa de bàsciu. Po cust'arrexoni candu scriu imperu sempri su primu fueddu chi mi benit a conca,e,forsis, sempri po sa propia arrexoni,no cumprendu totu cust'avolotu e custas brigas poita sa Regione at pregonadu sa LSC,una limba chi no ndi furat nudda a nemus,ca totus podimus sighiri a allegare sa varianti nosta chena chi nemus tengat cosa de nàrrere.

Sa LSC est nàscia feti po is atus ufitzialis de sas istitutziones e si puru,po imoi,ddui podet èssere prus logudoresu chi campidanesu est una cosa chi si podet mezorare e su bisu miu est chi,a bellu a bellu,potzat unu cras èssere sa limba de totus sos sardos e ndi potzat bessiri una limba arrica meda,cun fueddus de cada parte de Sardigna,chi gasi emus a tènnere centu sinonimus po cada fueddu. E ita festa manna po poetas e scritores!Ddui ant àteras cosas chi no cumprendu.Una est seguramenti poita ddui apat zente chi narat chi cun sa limba unificada no si cumprendimus a pari. Custu no est beru!Ca si,tanti po nàrrere,in campidanesu naramus cani in logudoresu naramus cane e pani est pane,rundinedda est arrundiledda i emus a poder sighiri po oras,aundi sunt sos problemas?

Seguramenti in cada bidda s'imperant fueddus chi no s'intendint meda in àteru logu comente,pro fagher un'esempiu, cupieddu,chi a Lanusei ddu narant a su porceddu e posca fintzas a corant'annus fait in Casteddu si fueddaiat de manera diferenti in cada cuartieri;tanti po nàrrere,in Casteddu de susu is signoris imperaiant meda is frantzesismus e in Sant'Arènnera ddui fiat meda su fenomenu foneticu de su rotacismu e a Is Mirrionis fiant in medas is chi chistionaiant su "gergu de soparma",chi iat a èssiri sa lìngua de sa malavida e soparma cheriat nàrrere Buoncammino (poita chi est in unu cucuru,a suba e chi si naraiat po cussu soparma chi cheret nàrrere sopra, ma de custu gergu nd'eus a chistionai prus a innia,ca seu ponendi impari unu ditzionarieddu).Sa chistioni,po mimi,est chi no cumprendet chie no ddu cheret fàghere.

Un'àtera cosa chi mi sonat mali est candu intendu nàrrere chi semus in pagus sos sardos chi imperant sa limba po faveddare de onzi cosa.Deu tengu unu muntoni de amigus in cada parte de Sardinna e chistionamus in sardu de totu,de sa polìtiga a sa poesia,a s'economia,a sa filosofia,a su sport e tando no est sa beridade chi ddu faghent feti Soru e Lilliu e pagus àterus.E posca emu a bolli nàrrere a is chi narant chi tocat a donai importàntzia a totas sas minorias linguìsticas chi semus totus de acòrdiu,ca est una cosa naturali,ca nemus cheret fàghere dannu a chinisisiat,perou ddu at de nàrrere puru chi no podimus fàghere centu limbas ufitziales.A ndi segai sa limba est a ndi segai is arrèxinis.

Su bisu miu est chi sos pilocheddos in iscola imparint beni a faveddare su sardu,s'italianu e assumancu àteras tres limbas istranzas po si podiri abèrrere a su mundu,a unu mundu sena de marcus digitalis po nemus,ca nois depimus ammentare s'istòria,no dda depimus olvidare,ca no depet torrare a sutzèdiri su chi est sutzèdiu setanta annus fait.Elsa Morante in su libru "La storia" ,chi est su chi prus m'at agradadu a giovuneddu,narat: "s'istòria est unu disacatu chi s'arrepitit de bintimila annus." E posca dda depimus acabai de s'afrentai s'unu cun s'àteru cumenti sunt faghende contra de Bolognesi ca est zente chi at sempri tribagliadu beni po chi sa limba de su Dna nostu sighessit a bìviri e tenessit importàntzia sempri prus manna. Cun sas peleas no si lompit a nisciunu logu. 

Gianni Mascia maistu de scritura in sardu,italianu,spagnolu,ingresu e frantzesu e bortadori.