Depit essi fendi basca meda oi puru in Casteddu. Oi, su 24 de mesi de argiolas, in “L’altra voce” nd’est bessiu un’atru articulu strolicu e malu a cumprendi. In s’articulu, Marinella Lörenczi torrat a fueddai de patatas—che volgare!—de Bikipedia e de Aymara—lastima ca s’amigu miu Simon, docenti de Quechua in Leiden e espertu de linguas andinas est in ferias!

S’unica cosa interessanti de cuss’articulu est ca Lörenczi at scobertu ca Bikipedia puru at incumentzau a fai su chi Diariulimba est fendi de sempri: pubblicant articulus in LSC e articulus in atras bariedadis de su sardu. E non est ca issa custu non ddu sciri, ca Diariulimba ge ddu ligit e ge murrungiat puru e fait sa vitima candu calincunu ddi circat contus in sa revista. Poita ddas scrit cussas cosas insaras? “Para fastidiar” est craru, ma puru po cullionai sa genti chi ligit “L’altra voce”, ma non ligit Diariulimba. Arratza de arrispetu po su pubblicu! 

Ma custa est genti acostumada sceti a is studentis issoru: piciocus e piciocas chi, po passai s’esami, abarrant atentus a non fai arrinegai a su docenti. Parit su ‘68 a.C. candu is studentis teniant atza. Is docentis de oi non funt prus acostumaus a ddus criticai is atrus e candu sutzedit, prangint e tzerriant che proceddus sgannendi-ddus. Po serrai, peró, Lörenczi at nau una cosa de importu:
“Sa Regione at arrisparmiau dinadeddu cun is universidadis de Casteddu e Tatari”.

Lampu, arretza de cinismu!
Totu su dinai po su sardu chi is universidadis italianas de Sardinnia ant aguantau blocau totu custus annus po issa est dinai arrisparmiau!
Ma innoi Lörenczi s’est traixa.

Duncas non est s’abbisongiu de sarvai s’arrichesa de bariedadis de su sardu chi dda movit in sa gherra sua contras a sa LSC. Sinuncas immoi iat essi arrinegada po totu su dinai chi is universidadis s’ant aguantau firmu: dinai chi iant potziu imperai po fai cursus in “campidanesu”, in “logudoresu”, in tabarkinu, in tataresu, in gadduresu.

Dinai chi iant potziu imperai po cursus chi, stimolendi su sardu in generali, iant stimolau is bariedadis puru o a su contrariu: a gustu de issus, ca cun sa scusa de s’autonomia de s’universidadi, faint su chi ddis praxit. Chi nde ddus interessát calincuna cosa, de su sardu, cussu dinai dd’iant spendiu—e spendiu beni!—e non allogau. Ma a su postu de ndi tenni brigungia, issa si ndi bantat: eis arrisparmiau dinai! Figurai-si: ordinais una machina e, a pustis de annus, nd’arribbant cun un bicicleta e si nant ca eis arrisparmiau puru!
Corrudus e cullionaus!

Ma a propositu de arrisparmiai, cantu est costau su master de antropologia — in italianu — de su maridu de Lörenczi?

Roberto Bolognesi