© LimbaSarda 2004

 

 

 

 

 

 

 

 

 

 

17/07/2005 Sòtziu Limba Sarda/ Propostas 

Unidos po sa limba

de Daniela Sanna


Amigos e amigas,



bos naro gratzie pro essere bennidos innoghe, pro custu cùmbidu chi pro a nois de su sotziu limba sarda est importante meda.



Devo narrere sa veridade, so meda emotzionada, pruite dae cando so in su sotziu, no appo faeddadu mai dainanti a sa zente, e nemmancu in sardu. 

Ma in cunvegnos e abojos chi appo sighidu, appo abbaidadu e intesu cales sunt pro sardos meda sas isperas e sos bisos chi intendent in su coro, chi intendent dae sempere in sas intragnas (nell’anima) issoro ma chi meda ‘oltas no resessent a narrere o a contare. 



Como chelzo contare ite appo intesu eo e pruite so cunvinta chi su prozetu chi fintzas a como at mandadu a innanti SU SOTZIU LIMBA SARDA devet sighire cun fortzas noas puru, e cun entusiasmu e passione.



Appo connoschidu su sotziu da pagu annos e mi so apassionada a sa cultura e a sa limba nostra, e appo detzisu de nde faghere parte deo puru pro fraigare calchi cosa pro s’amore de sa terra nostra.

Tzertu non so gai brava a faddare sa limba sarda, bi proo, fintzas oe, pruite so deo puru, de cussa generatzione a sa cale l’ant truncadu sa limba de domo.

Babbu e mama sunt Othieresos, ant istudiadu, sunt bennidos a tribagliare in campidano, e, a dolu mannu, a sos fizos no ant insizadu mai a faeddare su logudoresu…una limba gai bella!!!



Calicunu at nadu chi a unu populu si li furant sa limba li leant tottu.Puru su coro e sa cultura, s’identitade, s’amore pro sa terra sua…. E custu ant fattu a sos sardos!!!

Lis ant leadu s’anima pro no essere pius issos etotu. O menzus su sentidu de essere parte de unu populu forte. Sa cussentzia de aere giai totu.



Tzertu, no est istadu sempere gai, e non in totue, pro caridade! Ma pro annos meda, e como cust’arrejunu sighit ancora, nos ant fattu pessare chi sa limba sarda e totu cussu chi fit sardu fit “grezzu”, no serviat a nudda, fit folkloricu, fit antigu, e nois deviamus tirare ainnanti cun su progressu. 

…..Nudda de pius faddidu!!!…..



Como, giovanos meda, comente a mie, ant cumpresu o “iscobertu” ite nos mancat. Ite sos mannos nostros aiant, e nois non amus pius. 

Ite semus e comente est istada s’istoria nostra….e comente est posta como sa Sardigna de su “progressu mannu”!!!!



Fortzis custos pagos giovanos, l’ant cumpresu pruite si acciopant ancora “macos, volontarios”, eroi, s’at a podere narrere, chena perunu interesse chi no siat de creere a sa cultura e a sa fortza de sa diversidade nostra e chi sighent a nde faeddare fintzas si nche los ant postos a un’ala, in unu cuzzolu, chena lis dare peruna importantzia.

Sunt e semus, cussiderados “integralistas” pruite amus valores e istima pro sa terra e sa cultura nostra.

Ma comente semus giompidos a custu puntu, e ite nois podimus faghere pro mezorare???? 

Sos sardos ant unu visciu malu…no si informant….”SUBISCONO” e poi si che lamentant e no sunt cuntentos mai.

Tando, COMO, tocat de si nche ponnere IMPARE, cussu chi no amus fattu mai e chi nos est costadu sa LIBERTADE!!!!!

Sa libertade psicologica chelzo narrere!!!!!



Ponimus a un’ala custu cumplessu de inferioridade e custu provincialismu chi tenimus, ‘oghendene dae sa conca s’avesu de faghere su copia e incolla dae ateros. 



Podimus essere modernos ma cun sardidade. Devimus imparare dae ateros populos chi, unidos, resessent a otènnere cosas meda. Devimos imparare a dimandare cussu chi nos ispetat.



Como est diventende naturale, una moda, pro totu sos politicos, de faeddare de identidade, de cultura sarda, e calchi ‘olta de limba puru. Ma devimus cumprendere chie lu creet de aberu o chie lu narat pruite est ruffianu! Pruite at cumpresu chi sos sardos cherent torrare a sa limba e a sa cultura issoro e custas fainas las istrumentalizzat.

Su sotziu limba sarda cheret sighire a essere una ghia pro agiudare sa zente chi creet in sa fortza e potentzialidade de sa terra nostra, de sa cultura nostra, de sas ideas. 

Custu Sotziu at sa ‘olza de tribagliare pro a nois sardos, e no sempere pro ateros!!!! Cheret informare pro dare cara a sas istitutziones e amministratziones pubblicas, e pro dare cussizos a chie cheret de abberu ischire ite sutzedet in Sardigna. E ancora, pro faghere atobiare tota cussa zente chi tenzat famine de sardidade e no ischit inue la acciopare de aberu!!!



Deo dimando a bois e a totu cantos sient interessados a tribagliare pro difendere chena paura peruna sa terra nostra, dimando a totu cussos chi creent de aberu chi sas cosas podent mudare si nois sardos lu cherimus… 

dimando de intrare in su Sotziu nostru, pro iscriere, faeddare, tribagliare pro essere unidos pro unu fine solu e comunu: de liberare sa Sardigna dae su cumplessu de inferioridade. Cunvinchere sos sardos chi sunt nòdidos.



Comente podimus faghere tottu custu?

Su Sotziu in custos annos at fattu prozetos pro comunes meda pro sos isportello limbisticos. Cun sa leze Istatale sos finantziamentos sunt arrivados, e dae cust’annu s’at a podere cumintzare a tribagliare. Amus bisonzu de seriedade e professionalidade.



Cherimus chi bois istudiades e arrejonades cun nois pro detzidere ite faghere e cales podent essere ideas noas pro otennere s’attentzione de sos sardos. Cherimus tribagliare non solu cun sas paraulas ma cun sos fattos cuncretos.

Devimus tribagliare pro essere una fortza chi podet proporre ma preguntare puru, a ‘oghe manna, a chie nos guvernat, contos e risultados. Ma devimus essere meda, pro aere unu pesu mannu.



Devimus apariciare abojos in modu chi sa zente iscat comente andant sas cosas e cale sunt sos deretos issoro pro los dimandare pro los pretendere. Devimus impitare medios massivos (radiu e televisione), devimus dimandare trasmissiones e giornales in sardu cun notiscias importantes pro sos sardos. 

Devet finire sa censura e sa discriminatzione, pro ideas, limba, cultura. 

Devimus essere presentes, iscriere a Regione, ateras istitutziones, Governu, Unione Europea, comente amus giai fattu in calchi occasione pro dimandare cussu chi nos ispetat. Ma torro a narrere chi devimus essere meda pro chi nos iscultent.

Est finidu su tempus de tennere sos ojos in basciu e narrere sempere chi emmo. Semus istudiados, intelligentes, simpaticos, ischimus ite cherimus. Una Sardigna noa, una Sardigna nostra!!



Non so nende chi su Sotziu at a essere unu movimentu chi si lamentat ebbìa, NOOOO!!! Devimus PROPORRE!!!

Devimus aere sas ideas e sos prozetos. Devimus essere unidos e faeddare cun sa zente pro cumprende ite sa zente cheret.

Gai ebbìa nos amus a intendere parte de unu populu chi pedit e at a tennere ite lis ispetat.

Tribagliamus impari batende sos argumentos nostros a s’atentzione de s’opinione pubblica, e ….iscudende su marteddu a su giau pro nche lu incravare bene in su muru amodu chi non che essat prus. 

A segus