© LimbaSarda 2004

 

 

 

 

 

 

 

 

 

 

06/12/2004 Parres libberos

Sas allegas malavias

de Micheli Ladu

In s’Unione Sarda de eris est issia una notissia chi chistionavat de sanidade e limba sarda. E a su comintzu a la leghere faghiat finas piaghere: in nd’unu atoviu ammaniadu dae s’Ufitziu de sa Limba Sarda de Nugoro e s’assessoradu comunale de sa Cultura de Aristanis cun espertos de Catalunya e de Boston, amus ischiu chi finas s’Asl nugoresa at a impleare su bilinguismu. 
Una notissia menzus non si podiat intendere! 
Ite b’at de menzus de unu dottore chi ti chistionat in sardu e chi ti pedit “Narade trintatres” e non “Dite trentatre”? Ite b’at de menzus de fagher intrare sa limba nostra in totus sos settores de sa vida publica? Ite de menzus de fagher torra acurtziare sa zente a su sardu? Nudda. A parte chi cando custu si faget si sigat unu criteriu coerente. Ca finas a cando su dottore preguntat “ Ite bos dolet tzia Luchě” o s’inditant sos organos de sas pessones cun su numene propiu in sardu narande Isprene e non Milza non b’at nudda de cuntestare, ma cando si chistionat de cartellonistica tando in cue incomintzant sas faltas. Andamus a biere un’esemplu: su repartu de Radiologia s’at a mutire Diagnosticas pro immazines! Como, non est tantu sa chistione chi custa allega parzat prus una controllu a cuadros e fotos, (Diagnosticas cun immazines fotzis diat a esser prus adata) cantu chi si resolvet su problema de tradutzione cun nd’una contraditzione. E custu, a su mancu cando s’impleat unu criteriu logicu o “Internatzionale”, non si podet atzetare. Pro esser prus craros: pro che moere un’allega latino-greca si nde ponet una greca, comente unu cane chi si mossigat sa coa. Radiologia benit dae su latinu Radium (Raggio) e su grecu Logos (podimus narrer Studio) “Studio attraverso i raggi(x)”. Como pro che moere custa allega si ponet cussa greca Diagnostica, Dia (Attraverso) e Gnosco (Conoscenza) Conoscenza attraverso le immagini. 
Cun custu cherzo narrere chi no est semper obbligu fagher una tradutzione, primu ca b’at su perigulu de fagher inghirios de allegas chene capu ne coa, segundu ca ismentigamus cal’est s’eredade de sa cultura classica in settores comente cussu de sa medighina, terzu pro una calesisiat tzia Diagnostica o Radiologia semper malavia abbarrat.
Paret chi cun custu che apo accabbau, ma apustis mi benit una duda: cheres biere chi in Boston sunt cumbintos chi nois sardos andamus a su repartu de Ortopedia pro nos fagher sa bisita a sos ocros? Isbetande de ischire dae sos espertos istranzos in cantas maneras si podet narrer Tomografia Assiale Computerizada bos saludo.
Micheli Ladu

A segus