Chelzo ammentare chi sa redatzione de Diariulimba aiat pubblicadu in PDF su 6 de friaju de ocannu (e d’onzunu lu podet iscumbatare in sos archivios de custu situ) una determinascione de sa Rezone inue si prevediant finantziamentos de s’Europa pro agiudare sa cultura sarda, cun su fine primu de faghere pius longa s’istagione turistica in Sardigna.
Ma sa realidade de sa chistione, a parre meu, est divescia meda dae cussa chi s’Assessoradu de s’imparu, isport e ispetàculu nos cheret contare. Bastat a lezere sa determinascione cun s’ojos de unu “sardu beru e obiettivu” e no cumplessadu, pro cumprendere chi nos sunt coglionende.
S’inare, chi a cantu pare at a essere meda, at a servire, narat su documentu, pro “strutture e servizi per attività culturali e di spettacolo, azioni di organizzazione e realizzazione eventi culturali e di spettacolo e promozione eventi di grande rilievo culturale…..” Pius a innanti si narat “manifestazioni culturali legate a tradizioni culturali della Sardegna o che in Sardegna abbiano raggiunto una maturazione tale da essere considerate strettamente legate all’offerta culturale sarda..” Sighit s’elencu de sas inisciativas. Ma mi frimmu inoghe, pruite s’ùltima frase est importante meda pro cumprendere inue s’Assessora a s’imparu rezonale cheret giompere.
Difattis, andant ‘ene sos carrasegares de Sardigna, sos ritos de sa Ghida Santa, ma 10 o pius "festivals" de Jazz e Blues de faghere in unu annu, in Sardigna, mi parent meda veramente. Pro no narrere de sos finantziamentos pro s’Ente Liricu chi in sa finantziaria rezonale no ant apidu perunu tagliu e como sa Rezone lu cheret azudare cun su POR puru.
Su jazz est bellu, aimus puru calchi artista sardu bravu meda e reconnoschidu in totu su mundu, est tzertu de valorizzare e faghere connoschere, ma no est cultura de Sardigna.
Non faghet parte de sa cultura Sarda. Non gighet raighinas in sa cultura nostra finas de faghere 10 festivals jazz, si non de pius, in tota sa Sardigna. Semus faeddende de miliardos de sos francos ‘ezzos, de miliones de euro novos! Fattende sa proposcione bisonzat de si dimandare cantos sunt sos sardos interessados a su jazz, cantos lu praticant, cantos turistas podent bennere in Sardigna pro intendere jazz?
Si su fine de su POR e de sa politica de sa Rezone est, cumente narat custu documentu, de battire zente furestera dae sas costas de su mare a s’internu de sa Sardigna, in sas biddas, d’onzi ‘idda b’at calchi cosa. Tradiscione, artigianadu, istrumentos musicales, costumes, ballos, archeolozìa de valorizzare pro los faghere connoschère a sos turistas puru. No cun su folklore ma bivedèla sa cultura nostra.
D’onzi sardu at a dèvere aere su sentidu de apartenentzia a sa cultura sua, a sa terra, a sa limba. At a devere essere fièru de chie est, e de inue bivet.
Solu si nos presentamus a su mundu cunvintos de cussu chi semus, siguros de su chi podemus dare, e no leàre ebbìa, amus a poder piàghere a chie bennet dae fora, e a nois etotu puru.
Pruite, sos turistas no sunt màcos, si giompenent in sas biddas cherent proare mandigos de su logu, cherent intendere sa musica sarda, cherent faghere su ballu nostru, si cherent intendere coinvoltos. Pro cussos che sa Sardigna la chèrent connoschere de abberu, est comente andare in un ateru Paese no in Italia. Ischint chi in Sardigna podent acciopare usantzias e tradisciones divescias meda dae ateros logos e ateras culturas. Podent intendere, e meda cherent imparare fintzas, calchi paràula de un’atera limba, su sardu. Pruite sa cultura de sos sardos si podet acciopare inoghe ebbìa. E tando faghìdeli ballare su ballu tundu, faghìdeli manigare su porcheddu, faghideli intèndere cuntzertos de artistas chi cantant in sardu, chi bi n’de sunt meda e faghent musica etnica e moderna puru.
Est tempus chi sa Rezone mudet sa rotta. Chi no siat pius cumplessada issa puru comente sos sardos etotu. Devet agiudare sos sardos, dare s’esempiu, essere sa ghia pro fàghere cumprendere chi sa cultura nostra est bella e àndat fatta connoschère comente est de abbèru.
Unu festival Jazz in Sardigna, est fìntzas pretzisu a lu faghere pro s’onore de sos jazzistas sardos, ma bisonzat chi nos ammentamus chi su dinare pùbblicu est pro totus no pro sas “eccellentzias” ebbìa. Sos turistas, connoschende sas cosas popolares sardas si nd’ant a torrare a domo cun s’ammentu de aere fattu calchi ballu tundu, aere intesu musica sarda, coros a tenore, launeddas, grupos modernos, limba, chi no ant a intendere in perunu ateru logu de su mundu. Su Jazz b’est in totue e in sos Istados Unidos est mezus puru de inoghe.
Ammentamolu chi su turismu est economia. Ma est ligadu puru a sa cultura de su logu chi si visitat. E tando ponimolu a mente chi una cultura forte e originale in su sentidu de sos sardos battit fintzas richesa, in su coro e a sa busciacca. Est custu su trabagliu chi sa massima istitutzione de sa Sardigna devet faghere, esportare cultura sarda e no importare cultura americana ispacciandèla pro sarda. No b’at a creere nisciunu.
