© LimbaSarda 2004

 

 

 

 

 

 

 

 

 

 

11/04/2005 Subra sas criticas a Atlantiką

Il mito dello Sfatatore di miti

de Micheli Ladu

A ispiegare ite cherzat narrer Essere Omines diat a essere dificultosu meda e diat a essere finas unu pagu cosa de barrosos a chircare de lu fagher. Ma intre sas cosas chi nos faghent intendere Omines e nos distinghet dae sos ateros animales, a parte sa ratzionalidade, pesso chi bi nde siat una particulare: cussa chi Nois Omines semus Criadores de Mitos. In cada angrone de custu mundu nostru, in cada tempus de s'istoria nostra Nois amus contadu sa realidade cun su mito e sas paristorias. E s'antropolozia chi istudiat sas manifestatziones umanas e sas frommas suas de produssione, sempere at atoviadu in su camminu suo custa manera de pessare, biere e contare sas cosas. Torro a repitere chi s'immazinariu collettivu, chi siat isse mito o paristoria, tenet una fortza manna chi medas timent, ca est una fortza chi trazat e mudat sas cosas. Est una fortza chi faghet biere sa matessi cosa in manera difenente. Una fortza chi in logu de carchi perda posta in tundu faghet biere Stonehenge e sos Druidos, chi in logu de unu cantu de ferru faghet biere Exalibur e Artł, chi in logu de duos arvules e tres erbeghes faghet biere sartos firdes, Elfos e buscos incantados. E totu custu, agradet o nono, batit zente e dinare in sos logos chi dae s'immazinariu cumone ant tiradu sa parte bona. Ego non pesso chi s'immazinariu collettivu pertochet solu a zente furba in malafide o a zente drolla in bonafide. Peus de custas duas zenias de pessones b'at cussa de s'antropologu chi las at imbentadas, chi intendet su fragu de merda berbeghina cando est in Trexenta ma su nuscu de libertade cando est a Galway in mesu de sas erbeghes istranzas. 
Su mito servit a ispiegare cun ateras allegas sa realidade ma calicunu cumente a Angioni at narau "Atlantide non esiste! E' solo una parabola!" e l'at narau a sos Sardos e a sos Pariginos e a sos de s'Unesco segunde issu tzecos e ingaddinaos.
E tenet resone!
No esistit Atlantide, esistit solu su mito de Atlantide gai e cumente esistit sa Sardinna.
Antzis esistit sa Sardinna chi est istada ispiegada e contada cun su mito de Atlantide. E bastu!
A s'antropologu ispuligadore de bisos, chi chircat su mito de "Sfatatore di miti" fortzis toccat a ammentare chi "Le Favole" sunt pro sos pilocheddos, ma nos lasset a su mancu Sos Mitos chi intames sunt po, e de, su populu!

A segus