« Chie abberit unu libbru, e comintzat a legere, at a su sentidu de àere giumpadu unu giannile chi non si depiat giumpare.” Est beru, custu sentidu l’apo proadu eo puru cando apo incomintzadu su libbru “ su Mudu de Caddura”: a un’ala sentia chi chie l’aiat iscritu, Enrico Costa, iscritore Tataresu in agabbu de ‘800, mi fit ispinghende a mi che intrare in sa bida sarda de su tempus, in sa bida de sos istatzos, e dae s’àtera intendia un iscera de birgonza in s’intrare in cussu ispatziu privadu, a su cale neune m’aiat atrintzadu. Pro custu motivu apo apidu su bisonzu de preguntare a un’amigu sardu pro ischire comente est sa campagna Cadduresa, pro cumprèndere menzus sas pessones de su romanzu: unu foressidu surdu e mudu dae cando fit nàschidu, sa fiza de unu pastore benepostu, e sa trobojada istoria de sas “disamistades”.
Sunt sos montes de Caddura gai pienos de lughe chi m’ant leadu su coro in custu libbru. Sos sentidos chi naschent in s’ànimu cando ses legende sunt matanosos a cumprèndere, chi guasi non benit nemmancu bene a los contare, puru ponzèndemi in pagu. Si fia istada una pintadora, forsis bos aia pótidu fàghere a cumprèndere menzus sas campagnas in sa cales mi so agatada acumpanzada dae su protagonista primarzu: Bastianu Tansu, foressidu de sa “ disamistade” de su logu, surdu e mudu dae sa nàschida e chi pro amore de Bainza, fiza de pastores, benit a èssere ammasedadu; si pentit ca proite afines si sentit amadu dae calecunu, si sentit cumpresu da una fémina e s’autore li dat boghe, nde li faghet essire sos sentidos, sos vitupérios, sa cuntentesa, sas bètias isfundaradas, s’acunnortu de si cuare in sas malesas e in sas rocas de sa Caddura.
Cussos chi Bastianu atraessaiat sunt montes cossumidos dae su bentu, tundos o isboidados dae su tempus. Montes de granitu lughende, siat suta su sole o suta su lugore de sos isteddos o de sa luna. Montes múrinos, o rujos, o a bias in colore de rosa, e si ammisturat cun sos colores de sas macras chi si che apicheddant in sas costeras, dende a s’aera cuddos nuscos de murta o de nibberu, de armidda o de rosmarinu, de martigusa o de chessa e de totu cuddas isceras de matas chi sa natura at dadu a sa Sardigna. E s’incantu bos imbreagat cando a tottu custu, in sas marinas, b’annanghides s’isgiucamare chi si che addobbat a sas rocas lassindendelas con sas abbas limpidas e cun su maestrale, e fatende de sos montes istatuas mannatzas chi parent postas in cue solu pro nos las abbaidare.
