S’est tenta gioja passadu sa tertza serada de su ciclu de initziativas promòvidas dae s’isportellu linguìsticu de su Comune de Tissi, articuladu in bator apuntamentos chi pertocant unu progetu linguìsticu finantziadu dae sos fundos de sa lege 482/1999, pro s’amparu, promotzione e avaloramentu de sa limba sarda. Sa serada at bidu sa partecipatzione de su regista Giuanne Columbu, chi at presentadu calchi provinu de su film sou, intituladu “Su Re”, ischirriadu dae s’Evangèliu. Su film est ambientadu in Sardigna, e est istadu giradu totu in limba sarda.

A pustis de una breve introdutzione subra su tema de sa serada, dae parte de s’operadore Istèvene Chessa, prof. Micheli Pinna presidente de s’Istitutu de Istùdios e Chircas “Camillo Bellieni”, at evidentziadu s’importàntzia de custu film chi, a pàrrere sou, podet èssere cunsideradu unu trabàgliu de valore universale, a diferèntzia de cantu fatu fintzas a como dae sa cinematografia sarda, chi at caraterizadu sa Sardigna comente unu logu chi mustrat solu sa diversidade sua.

Su regista Giuanne Columbu at descritu su trabàgliu sou frimmèndesi in manera detagliada subra sos motivos chi l’ant giutu a fagher custu sèberu, siat pro cantu pertocat sos logos de ambientatzione chi pro s’impreu de sa limba sarda; motivu, cust’ùltimu, chi at giutu su ministèriu a negare sos finantziamentos pro sa revèntida de su film.

Mancari bi siat custa recusa, su regista est su matessi andende a dae in antis in su trabàgliu sou, in su cale creet in manera forte, puru cun su cunsideru de sas dificultades mannas , in manera particulare de caràtere econòmicu.
S’initziativa culturale, bida s’importàntzia de su tema tratadu, at registradu una partecipatzione manna e est finida cun unu cunfrontu de su pùblicu chi fit in sa sala e su regista, chi at gai dadu spetzìficos crarimentos a calchi curiosidade manifestada dae sos partetzipantes.

S’apuntamentu cun s’initziativa imbeniente est fissadu pro gioja 25. In custa ocasione s’operadore at a descrìere totus sos trabàglios fatos in s’annu de atividade chi est finidu como.

Istèvene Chessa