SU GIASSU
Domo
Ite est Diariulimba
Sa gerèntzia de Diariulimba
Su Sòtziu Limba Sarda
Organigramma de su Sòtziu
LINKS
ARCHIVIU annu pro annu 
Pro retzire sa lìtera de noas
ISCRIENOS
diariulimba@sotziulimbasarda.net



Diretore: Pepe Coròngiu       Coord.Editoriale: Micheli Ladu
CHISTIONES

30/09/2006 
Naschit su Comitadu de sos Iscritores "Limbudos" 

Unos cantos iscritores de sa minoria linguìstica sarda, paris cun àteros operadores linguìsticos, si sunt atobiados domìniga 17.09.2006 in Làconi (OR) pro arresonare cara a pare de limba, literadura, poesia, editoria, polìtica linguìstica e identidade comunitària de su pòpulu sardu. S’ant postu, comente nòmene provisòriu, “Limbudos”. Una manera fintzas brullana de fàghere a cumprèndere chi si distinghent dae àteros iscritores pro s’impreu de su sardu. 


Dae su cunfrontu, chi at tentu sa dura de unu mangianu intreu, nd’est essidu foras su disìgiu de sighire a si bìere e a si faeddare, pro chircare de acumprire fainas, meledos e initziativas bonas pro su tempus benidore de sa limba. Su chi s’est printzipiadu est unu coordinamentu non de pessones ebbia, ma de sentidos, ideas, parres e ànimos fintzas diferentes, ma chi si reconnoschent in paritzos puntos de ghia chi ant comente coro e punna sa chistione de sa limba e de sa literadura de sa minoria linguìstica sarda in die de oe. 


Non b’est su presumu de rapresentare totu sos iscritores chi iscrient in sardu, nen totu sa cumplessidade de sa literadura regionale in calesisiat limbàgiu siat iscrita, ma de pònnere paris pentzos e esperièntzias de argunos iscritores, e de àteros operadores de sa minoria linguìstica sarda, gasi comente est reconnota dae leges de s’Istadu italianu de s’Europa. In prus b’at àpidu su bisòngiu de iscaretzire argumentos e chistiones pro lòmpere a unu fundamentu comunu chi potzat èssere s’àndala maistra pro su traballu chi b’est de fàghere. 


Is iscritores limbudos, e sos àteros operadores linguìsticos ant iscritu unu documentu inue ant postu sas ideas insoro e cumbidant àteros iscritores a ddos agiudare e a aderire a custu manifestu. Cumbidant istitutziones, polìticos, partidos, sòtzios e dogni sarda e sardu de bona voluntade de cumprèndere cantu podet èssere mannu pro su tempus benidore de Sardigna s’agiudu dadu dae sa literadura in limba sarda; 


link a su documentu de su Comitadu Iscritores Limbudos 


Sos fundadores de su Comitadu de sos Iscritores Limbudos sunt :



Paola Alcioni

Pinuccio Canu

Francesco Casula 

Francesco Cheratzu

Giuseppe Corongiu

Tore Cubeddu

Nanni Falconi

Micheli Ladu

Vanna Ledda 

Antoni Maria Pala

Maria Antonietta Piga 

Giovanni Piga 

Paolo Pillonca

Michele Pinna 

Gianfranco Pintore

Anna Cristina Serra


Si ses interessadu a s'adesione cuntata unu de issos o iscrie a diariulimba@sotziulimbasarda.it 



  




 

 
 
 

 

 
diariulimba@sotziulimbasarda.net  © sotziulimbasarda 2004-2006,"e' vietato riprodurre articoli originali o estratti da questo sito senza l'assenso della direzione"