Tenet resone Dalila Tinti cando, in polèmica cun un’artìculu meu, narat chi sas iscolas prus minores non devent tancare ne in Sardinna ne in Italia. E bella diat èssere de pesare cuntentesa ca una pàia de mìgias de bidda italianas s’ant a bìdere tanchende sas iscolas. E però, o apo faddidu deo iscrivende o Tinti leghende.
Su chi non m’aggradat in sa pelea chi s’est pesada est su càrrigu ideològicu e de ischirriamentu partitigu. E chirco de mi fàghere cumprèndere cun una pàia de chistiones.

Sa prima est chi si male faghet sa ministra Gelmini, de su Pdl, a pessare de tancare iscolas, male at fatu su ministru Berlinguer, Pci, a àere tancadu sas iscolas a sos tempos chi guvernaiat. Su matessi pessu non podet èssere bonu si est leadu dae sa manca e feu si est leadu dae sa destra. Est beru a s’imbesse puru, craru.

Sa segunda chistione est paris paris sa chi apo pesadu in s’artìculu meu. Naraia chi s’arrempentada de s’assessora Mongiu (“E’ fondamentale che il ministro contempli le peculiarità della Sardegna, terra di numerosi comuni a bassa densità su cui gli effetti del ridimensionamento incidono in percentuale altissima rispetto al resto d’Italia”) est che a una ispada truncada. Sa presèntzia de biddas minores no est una ispetzialidade sarda bona a contrastare su pessu. S’ispetzialidade bera, sa chi podiat pònnere cara a terra su pessu de su guvernu, est su fatu chi sa Sardigna tenet una limba diferente dae s’italianu. Ma in totu custas dies de cuntierra no apo intesu mai ne guvernantes sardos ne mastros ne precarios ne sindicados ne partzidos pesende una chistione chi, pro nàrrere, in Sud Tirolu at sarbadu iscolas in biddas chi, a paragone, Boroneddu est New York.
Giai l’isco – e non m’ispantat – chi s’arte de s’opositzione est sa de cuntrastare a chie guvernat, ma isco puru chi a pesare badalogu est prus fàtzile de propònnere. Tando però no nos podimus lastimare, si su guvernu italianu leat atu chi mancu sos sardos sunt a gradu de defensare s’ispetzialidade issoro chi, torro a nàrrere, no est ne demografica ne geografica si non linguistica e culturale.

M’at a perdonare, in prus, Dalila Tinti, ma còmpidu a su tempus chi tèngio, coladu in parte manna a pònnere fatu a “sacri furori”, so iscrètidu e non credo prus a sos pre-giudìtzios, a sos giudìtzios, est a nàrrere, integrados pro resones, mancari nòbiles, ma ideològicas. Tinti narat chi “Custa ministra est fadendi su prexeri de su sistema scolasticu privau! Issa bolit distrugi sa scola pubblica po ammanniai sa privada”. Si podet dare, belle chi sas iscolas privadas sunt berrita a tortu narende chi Gelmini lis est doghende dinare e possibilidade de si la campare.
Si podet dare. Ma ne in su decretu oe lege ne in sas decraratziones suas ne in sos papiros chi ant amaniadu sos espertos suos apo agatadu una paràula chi est una chi punnet a dare prus podere a s’iscola privada. E tando che a Tomasu chèrgio bìdere, tocare. Non mi cuntentant sos chi narant: “Custa podet èssere sa torrada de…”. Dalila narat chi sa ministra “est punnendi a unu sistema che cussu americanu”.

A chie mi connoschet, ischit chi s’istima mea pro su sistema americanu generale est pagu pagu. Ma Deus l’ascurtet a s’amiga Tinti e chi a beru sa Gelmini punnet a unu sistema de istruzione che a cussu americanu, chi no at a èssere de badas si est mèria de unu muntone de sardos e de italianos chi si nche fughint dae s’iscola italiana. E non sunt petzi sos ricos chi b’andant, ma pro nd’arresonare foras de pre-giudìtzios e ideologismos tocat de connòschere comente si tocat cuddu sistema. Su chi est foras de custu interventu meu.