Sa Terminologia est su setore chi cunsentit a sas limbas de s'ampliare, de si cumpretare, de si modernizare. Est pròpiu custa chi, impreada mescamente in sos setores tècnicu-sientìficos, cunsentit a sas limbas de aumentare su nùmeru de sos vocàbulos e ampliare sa capatzidade de sas limbas de interpretare e denominare su mundu chi nos inghìriat.

Pro sas limbas natzionales che a su sardu, sas paràulas noas cunsentint finas de bìnchere s'idea chi siant petzi mèdios pro espressare su tempus coladu e chi non siant addatas a su tempus presente. Su fatu est chi no esistint limbas addatas e limbas "no" addatas a veiculare sa modernidade, ma limbas lìberas o privadas de lu fàghere, o limbas chi si sunt liberende.
Su sardu, cun sas leges chi lu cunsentint e cun sa voluntade chi tenent medas de nois, est de custa ùrtima categoria: cherimus un'isvilupu modernu de sa limba. Duncas sa terminologia e sas paràulas noas nos interessant. Gasi etotu pro sas àteras limbas minoritàrias.

Pro custu est nàschidu su Progetu interlinguìsticu LinMiTer (Terminologia de sas Limbas Minoritàrias), favoridu dae s'Unione Latina (Diretzione Terminologia e Indùstrias de sa Limba) de Parigi, cun sa collaboratzione de TermCat (Tzentru de terminologia de su Guvernu catalanu) e àteras entidades linguìsticas de sas limbas natzionales minoritàrias.
In àteros duos seminàrios fatos in Catalugna (Barcelona) e Còrsica (Corti) sunt istados aprontados Glossàrios relativos a s'Ambiente e a sos Trasportos.
In su de 3 seminàrios, su de ocannu in Lanusè, cherimus aprontare unu Glossàriu multilìngue de sa Salude, cun sa collaboratzione de s'Ufitziu de sa limba Sarda de sa Provìntzia de Ogiastra e sa ASL de Lanusè.

Su Seminàriu 2008, Neologia e risorsas terminològicas, est riservadu a rapresentantes de unas cantas limbas neolatinas chi leant parte in LinMiTer, chi s'ant a riunire in Lanusè (Istitutu Salesianu, viale Don Bosco) dae su 21 a su 23 de santandria, ma at a tènnere una parte aberta a su pùblicu de sos interessados dae su 24 a su 25 de su matessi mese, in su matessi locale de sos Salesianos.

Programa
de sas sessiones pùblicas de
h 9.00-13.00 / h 16.00-19.00

Lunis 24, presentada generale de sa situatzione atuale de cadauna de sas limbas partetzipantes in contu de risorsas libguìsticas (terminologia, neologia, lessicografia, istrumentos linguisticos, etc.)

Martis 25, assemblea pro propònnere e difùndere sas istrategias de Linmiter

Chie est interessadu a leare parte a su traballu de sas dies 24 e 25 e cheret riservare un'aposentu cun tratamentu de pensione cumpreta in sa residèntzia salesiana (47 èuros a pessone in aposentu duplu, 52 èuros a pessone in aposentu sìngulu), podet telefonare a s'ULS de sa prov. de Ogiastra, +39 0782 600 931, o iscrìere a:
uls.sar@gmail.com.