S’ùrtima isparada l’at fata su ministru pro sa Funtzione Pùblica Renato Brunetta, famadu in custos tempos pro sa gherra a sos isprecos: <B’at entes pùblicos inùtiles medas in Italia>. Cando at dèpidu fàghere assempros nd’at nomenadu duos: unu tzentru de ecologia alpina e s’Istitutu Ladinu de sa Badde de Fassa. Ispantu, meravìgia, pedinu. S’Istitutu de Vigo de Fassa est semper istadu unu modellu pro totu sas minorias italianas pro s’atividade sèria e iscientìfica chi at conduidu in sos annos. 


E puru su chi est costadu est custu. Unu de sas lughes prus mannas de sa polìtica linguìstica de sas minorias italianas postu in abolotu gasi, sena mancu pensare a su dannu chi si podet fàghere. Su chi faghet làstima no est tantu s’atza de sa minetza de Brunetta (s’Istitutu dipendet dae sa provìntzia de Trento chi est a istatutu ispetziale e su Guvernu tzentrale non la tenet in podere comente cheret), ma comente su ministru apat istrumentalizadu sa realidade de una minoria pagu connota e pagu defensada pro denigrare a una banda e, a s’àtera, afortiare sa propaganda (finas pretzisa carchi bia) contra sos isprecos de s’Amministratzione Pùblica. 


Si no est finas, comente at pispisadu calicunu, chi siat in realidade unu atacu mòidu dae intru de sa comunidade ladina etotu, pro buca de unu ministru angenu, comente a bias costat. Su pessamentu nostru est chi finas custu guvernu, paris cun cussu de Prodi coladu de pagu, non siat atentu meda a sa chistione de sas minorias internas e podat reservare carchi disacatu mannu finas in sa gestione de su dinari de sa 482. Amus a bìdere, a manera làica, comente semper at fatu Diariumba. 


Comente Diariulimba e Sotziulimbasarda amus imbiadu una lìtera de solidariedade a s’Istitutu e bos cumbidamus a lu fàghere bois puru chi leghides pro fàghere a bìdere chi sas minorias “italianas” ant imparadu a comunicare a e “solidarizzare”. A s’ignoràntzia tocat a respondere cun sa cultura.


Bos consigiamus de iscriere a info@istladin.net


E abbàidare su giassu de sistitutu e museu ladinu http://www.istladin.net/web/default.asp

de su cale bidides sas fotografias inoghe in suta 



Inoghe agatas intamas sa lìtera de chèscia firmada dae sos dotzentes universitàrios

bide sa lìtera