|
|
Diretore: Micheli Ladu - Editore: Sòtziu
Limba Sarda
|
|
CHISTIONES
|
24/11/2008
Su cau Jonathan Livingston “bolat” in sardu
|
Sa domo editora Condaghes de Casteddu at imprentadu su libru de
Richard Bach “Jonathan Livingston, su Cau” in sardu. Sa bortadura
est a incuru de Giuanni Maxia, poeta e iscritore casteddaju. Maxia
at impreadu una variedade de su sardu meridionale cun sèberos
personales e literàrios, ma, comente at naradu isse matessi, est in
favore a sos traballos pro una limba comuna megiorada in calicuna
parte.
Su libru, comente medas ischint, contat de Jonathan Livingston, unu
cau chi lassat sa truma pro sighire s’idea sua de bida, chi no est
feti a bolare pro si buscare sa cosa de papare, ma est sa chirca de
su primore in su bòlidu cumente bia de ispèddiu de s´intelligèntzia
e de sa connoschèntzia. Jonathan est su chi totus diamus dèpere
èssere in custu tempus macu e avolotadu, rennu de su "bombardamentu
mediàticu" e de "sa ditadura de su spot", in ue si balet feti su
dinari, s´aparèssere e non s´èssere, in ue chi no ses "grifau" ses
abandidadu.
Jonathan est unu chi creet in su mutu de su filòsofu giaponesu
Daisaku Ikeda chi narat gasi: "A èssere giòvanos cheret nàrrere a s´amegiorare
die a pustis de die". Giuanni Mascia si definit isse etotu unu “dreamer”
in su sentidu lennonianu, unu bisadore chi ispòddiat unu mundu a
colores, unu mundu sena marcos digitales, sena ratzismu e sena de
istallare a nemos pro resone. Pro custu bisu traballat e at semper
traballadu pro s’iscola, antis, pro una doighina de annos, cumente
maistru e a pustis, de oto annos a imoe, de espertu de poesia (chi
est istada, fintzas de pipieddu, sa passione manna de sa vida sua e
de poeta est connotu in Italia, mescamente in Sicilia in ue in sos
ùrtimos annos at bintu duos prèmios literariòs de importu:
“Leonforte” e “Karol Wojtyla”).
At fatu nàschere su fògiu de cultura poètica “Coloris de limbas” e
iscriet pro unas cantas revistas e giassos Internet. Si comente
tenet una medida de iscritura poètica antitraditzionale, non semper
s'acadèmia arcàdica de sos prèmios l'at dadu meressimentu pretzisu.
Ma b'at semper tempus.
“Su cau Jonathan Livingston” bortadu in sardu podet èssere un’idea
bona pro unu donu pretzisu pro sas Pascas de Nadale a chie est
amantiosu de limba sarda. Cun custu libru sighit su traballu de
Frantziscu Cheratzu e de sa canaca Paberiles chi est de importu meda
pro sa literadura in sardu e s'atibimentu de sa limba nostra in sa
sotziedade.
|
|
|