SU GIASSU
Domo
Ite est Diariulimba
Sa gerèntzia de Diariulimba
Su Sòtziu Limba Sarda
Organigramma de su Sòtziu
LINKS
ARCHIVIU annu pro annu 
Pro retzire sa lìtera de noas
ISCRIENOS
diariulimba@sotziulimbasarda.net



Diretore:  Micheli Ladu - Editore: Sòtziu Limba Sarda
CHISTIONES

21/11/2008 
Sa lògica de sos tzurpos: "Mi chèscio duncas esisto" 
Non si cumprendet proite, cada tantu, si torrant a pesare sas chèscias de sos campidanistas contra a sa lsc comente dae pagu in s’Unione Sarda. No at a èssere chi totu custas polèmicas serbint a cuare sa pagu capassidade de custa gente de pònnere in òpera una polìtica linguìstica a sa sèria? E a dare visibilidade pro una mangianada a chie imbetzes de traballare distruit? A chie est bonu a nudda?

Diat èssere pròpiu chi emmo si abaidamus sos protagonistas de s’artìculu prenu de fàulas firmadu dae Pietro Picciau, giornalista professionista e autore de libros in italianu. Picciau at fatu comente faghent cronistas medas in custos tempos: teniat una tesi de mandare a dae in antis e at intervistadu petzi sos chi la podiant cunfirmare.

Sa tesi fiat custa: sa lsc faghet dannu a su campidanesu, mègius fàghere duos istandard de sos gasi narados “campidanesos” e “logudoresos”. Una positzione de a beru “insostenibile” bidu chi su sistema sardu est giai polinòmicu (finas cun prus de duos standard) e, mentres sa lsc est riservada a sa Regione comente còditze amministrativu, sos àteros podent fàghere su chi lis agradat. Si bi resessent…E su problema est custu. Ca non sunt bonos!

Nono? Tando proite non l’ant fatu? Proite no ant traballadu? Bidimus unu pro unu. Mario Puddu, chi at fatu parte de sa commissione lsc duos annos como no est cuntentu de su resultadu, ma sigomente l'aiat inditadu àtere a sa commissione proite no at traballadu in ie? Proite no at fatu colare sa limba de Samugheo? Proite no at cumbintu a Soru? Forsis si diat dèpere pònnere in discussione comente istudiosu si tenet totus sos istrumentos iscientìficos chi deghent. Agigu de umilidade pro sas faddinas cumpridas. O puru l'ant coglionadu a beru e tando non podet pretèndere de artziare a cussu livellu.

Antoni Pani, de professione barberi, chi est assessore in Cuartu, proite non traballat in ie pro defensare su campidanesu? Proite non criticat mai sa Provìntzia o s’universidade de Casteddu chi no ant gastadu su dinari giau dae sa Regione (365.000 mìgia euros prus 1 millione e mesu de euros) propriu pro su campidanesu? In ue est totu sa capassidade si dae su 2005 sa comuna de Cuartu non resesset prus a si fàghere aprovare unu progetu 482 e chie traballat cun isse at a èssere deretu unu disocupadu? At cumpresu Pani sa diferèntzia intre polìtica linguìstica e folclore? Intre "mutetu" e norma?

Oreste Pili, coordinadore de sa limba sarda pro sa Provìntzia de Casteddu, non proat nessi agigu de birgòngia cando crìticat sa Regione bidu chi in sa comuna in ue est assessore no at mai mancu abertu unu isportellu linguìsticu (forsis una de sas pagas biddas in Sardigna)? E non li benit su disìgiu de si cuare pensende a su dinari imboladu dae sa provìntzia de Casteddu in 4 annos de tempus giai chi isse est su responsàbile? A cara manna de a beru!

De Solinas non nde balet mancu sa pena de faeddare, mentres de Blasco Ferrer nd’amus giai faeddadu. E nd’amus a faeddare galu ogni bia chi essit a campu cun su presumu de partzire a nois sardos.

Chie faghet dannu a sa limba? Issos o sa lsc ? Si comente non traballant, pro esìstere, custos fulanos, depent pesare prùghere si nono non los bidet nemos. Est pro custu chi si chèsciant de sa lsc, de su campidanesu no nde lis afutit nudda. Si nono diant fàghere carchi cosa prus de si chesciare cada tantu cun sos giornales italianistas.

Betze de moralidade! Mischina sa limba nostra in manos de custa gente!


direzione diariulimba








 




 
 
 

 

 
diariulimba@sotziulimbasarda.net  © sotziulimbasarda 2004-2008,"e' vietato riprodurre articoli originali o estratti da questo sito senza l'assenso della direzione"