S'idea chi ghiat sa manifestatzione Pastores Tenores est cussa chi pastoriu, càntigu a tenore, limba e cultura sarda sunt benes ligados a pare, benes de remonire e de afortire, e su cras insoro est in sas mentes, in sas manos e in fàghere de nois sardos. Custa festa est un'atòbiu pro sos sardos e pro totu cuddos chi amant e rispetant sa Sardigna, sa cultura sarda, chi at raighinas fungudas ma chi brotat galu froeddas noales ca est bia e forte.

Un'atòbiu a sa sarda, a sa moda de sas festas antigas de sas biddas o de comente sunt galu sas festas in sas cumbessias de sas crèsias in campanna. Festa chene parcos, chene ispetàculos de prastica, logu e ora de la fàghere sa zente mantessi sa festa, cantadores e pastores, massajos o ite si siat: sardos. Non b'at logu pro su folclore (in su sensu malu de cussa paràula), non b'at costùmenes, petzi sa zente, gai comente nd'est oe e cada die. 

No est su teatru de s'antigòriu, nè su museu de su chi fimus, petzi sa cultura e sa mùsica sarda de oe, de sa Sardigna moderna chi non s'irgonzat de su chi est e chi no at bisonzu de istròchere a niune. Cantadores zòvanos e cantadores prus betzos chi cantant pro su gustu e sa gana de cantare e de abarrare un'iscuta umpare, de s’arrejonare, de rìere e de brullare. 
Deghinas de tenores e medas àteros cantadores ant a cantare in sas carreras, in sas cortes e in sas pratzas de sa bidda, paritzos ant a presentare sos traballos issoro, discogràficos, de chirca, fotogràficos o multimediales.

Totu a inghìriu a sos tenores b'at essere su restu de sa festa cun sas arrejonadas, sos filmis etnogràficos, sas presentadas de libros sardos, ispetàculos teatrales e galu àteru puru. 

Tres dies de festa
Sa festa "Pastores Tenores" durat tres dies, dae su 5 a su 7 de Santu Gaini 2007. Sa prima die est dedicada a sa presentada de su "Distretto Culturale" de su tzentru de sa Sardigna . A merie s'aberint sas cortes a sa zente, a cumintzare dae sa domo de sa tràmuda. 

In sa manzanada de sàpadu 6 de Santu Gaini b'ant a èssere “reading” leteràrios e presentadas de romanzos e libros.

A cumintzare dae su merie de sàpadu s'ant a poter iscurtare sos càntigos de deghinas de tenores diferentes chi benint dae totu su tzentru de sa Sardigna. Cantadas lìberas, chena parcos e amplificatziones chi ant a sighire pro totu su sero in sas carreras, in sas pratzas e in sas cortes de sa bidda. Paris cun sos cantadores a tenore s'ant a poter iscurtare sos cantores de sa Còrsica e bi sunt puru sos cantadores e sos balladores de Eivissa e Formentera.

Arrejonadas, teatru, presentadas di libros e proietziones di filmis etnogràfìcos ant a prenare su sero.Sa die de domìniga presentat a su merie sos tenores chi cantant in totu sa bidda. 
E, comente a su sàpadu, fintzas sa domìniga at esser una die prena de arrejonadas, presentadas de libros, filmis, ispetàculos e mùsica. 

Bos cumbidamus a benner a Ollolai in custas dies, a bìdere, a iscurtare, a arrejonare, a faeddare e a cantare in sardu.

Bustianu Pilosu (Presidente de su Sòtziu Tenores Sardigna) 

www.pastorestenores.net 


ligòngiu in pdf a su programma