Irs narat ca eja a sa lege istatutària, ma proponet chi siat finas unu passàgiu pro lòmpere a un'Istatutu ispetziale nou chi reconnoscat natzione e limba. Unu comunicadu pro s'imprenta isparghinadu custas dies at bogadu a craru sa positzione de Indipendèntzia Repùbrica de Sardigna. 


Pro su movimentu ghiadu dae Gavinu Sale e Franciscu Sedda, sa Sardigna tenet bisòngiu urgente de unu istatutu ispetziale nou chi non siat cussu aprovadu 60 annos como. <Si non colat s'Istatutària - narat s'Irs - ant colare galu annos in antis de pòdere resonare de un'Istatutu Ispetziale nou chi, a sa fine, reconnoscat sa Sardigna comente natzione, sa limba sarda comente ufitziale e su deretu a s'autodeterminatzione de su pòpulu sardu>. 



S'istatutària difatis no est una lege manna comente un'istatutu, ma una simple lege de funtzionamentu de sa Regione chi nemos aiat pensadu de fàghere dae su 1948 a oe. Regulat sas competèntzias de su Presidentede sa Regione, de sa Giunta e de su Consìgiu regionale. Ponet òbrigos e lìmites (pro sa prima bia in s'istòria) a sos cunflitos de interessu pòssibiles e dat unu deretu prus forte a chie cheret propònnere referendum. Una lege pro nudda autoritària, chi antzis est un'ocasione pèrdida ca podiat èssere prus coragiosa pro dare a su Presidente àteras cumpetèntzias comente cussa de sa limba, pro nde nàrrere una. 



Ma fatu istat ca custa lege de simple asentu burocràticu-istitutzionale, una parte de sa polìtica regionale, pro motivos suos, l'at fata divenire un'iscòticu pro limitare su podere polìticu de su Presidente Renato Soru. Un'istrumentalizatzione chi, a cantu paret, no est agradada a Irs. 



<Irs frunit sa dibata de una prospetiva achistiada e de dura longa - retzitat su comunicadu - chi barighet sos sèberos astensionìsticos chi, puru si podent cumprèndere, ma chircat de mirare prus a tesu, pro pònnere sa classe dirigente unionista in s'òbrigu de iscaretzire in fines s'iscritura de una Carta Costitutzionale noa pro sa Sardigna>. 



A bisu de Irs, sa Sardigna non si podet permìtere prus de trigare pro pedire un'Istatutu nou e sa deruta de sa lege (e de Soru) diat perlongare galu sos tempos pro lòmpere a cussu arribu. 



Una positzione abista e "polìtica" de a veras foras de totu sa mediocridade chi semus avesos a registrare in chistiones delicadas subra sas cales sos diàrios sardos no informant comente diant dèpere. E mancu una idea chi podet èssere imputada de "lechinismu" in favore a Soru.



E su movimentu linguìsticu? A pustis de totu sas conchistas (traballosas e sudadas) fatas in custos ùrtimos tres annos, a si podet permìtere chi s'ùnicu Presidente chi at carculadu sa limba (mancu Mario Melis l'aiat fatu gasi) bèngiat umiliadu?



Argunos ant giai seberadu e fatu ischire su sèberu. Ateros abarrant a sa ventana in s'isetu de torrare a fàghere sos ingramessores de sèmper. Ma, istrochende s'Irs, non si podet pensare prus a una prospetiva longa chi nche colet sa lògica de su progeteddu e de su contributeddu pro èssere credìbiles comente operadores linguìsticos?