Est in disinnu pro giòbia su 23 de su mese de Onniassantu-Sant'Andria in Casteddu sa presentada de su romanzu de Micheli Ladu "S'arvule de sos sardos". 

S'atòbiu s'at a aparitzare in sa libreria Zonza de bia Paoli n°19. At a cumintzare a oras de sas chimbe e mesu de merie. At a faeddare, paris cun s'autore, sa poetissa Anna Cristna Serra. 

Micheli Ladu, ollolaesu, resurtat, pro como, su prus giovanu romanzeri in limba sarda mai àpidu. Est nàschidu in su 1975. 

S’est laureadu in Filosofia in Casteddu in su 2000 e dae tempus traballat po sa limba sarda. At collaboradu cun s’Ufitziu de sa Limba Sarda de Cuartu e at fatu su chircadore in s’Universidade de Casteddu po contu de sa Regione in sa didatica de sas limbas de minorias, istudiande in Friuli e in sas baddes ladìnas de su Trentino-Alto Adige. At fatu Master cumente dischente e est istadu mastru in sos Master ammaniados dae su comune de Cuartu, dae s’Universidade de Casteddu e dae sa Regione.

Imbentore de Iscolimba, su primu cursu de autoformatzione in lìnia in limba sarda, est fintzas coordinadore editoriale de Diariulimba, sa revista digitale de su Sòtziu Limba Sarda. 

Anna Cristina Serra, de Santu Basile de Monte, poetissa dìliga e rafinada, at sighidu s'arrastu de Benvenuto Lobina e est, a dies de oe, una de sas artistas prus leadas a cunsideru de sa Sardigna. Sa poesia sua sugugiat sèntidos, emotziones e ammentos chi tocant deretos a su coro de sa gente. Onni pàraula sua in una presentada est unu ferru chi pungit s'ànimu o una fògia de rosa chi carignat sos cavanos. 

S'apuntamentu de su 23 est de cuddos de non pèrdere pro chie at amore pr sa literadura sarda. 




giovedì 23 novembre h:17.30 , Libreria Zonza, Cagliari 

Presentazione del libro "S'arvule de sos sardos" (Condaghes) di Michele Ladu. Interverrà Anna Cristina Serra. 


Organizzano: Libreria Zonza, Iscritores Limbudos, Sòtziu Limba Sarda