SU GIASSU
Domo
Ite est Diariulimba
Sa gerèntzia de Diariulimba
Su Sòtziu Limba Sarda
Organigramma de su Sòtziu
LINKS
ARCHIVIU annu pro annu 
Pro retzire sa lìtera de noas
ISCRIENOS
diariulimba@sotziulimbasarda.net



Diretore: Pepe Coròngiu       Coord.Editoriale: Micheli Ladu
CHISTIONES

10/03/2008 
Cun Zapatero binchent deretos tziviles e natzionalidades. Totu a s'imbesse de su "riformismu" itàlicu.
[de Pepe Coròngiu]

In Ispagna binchet sas eletziones José Luis Zapatero, ma custu sonat comente una derruta pro sas fortzas polìticas italianas chi si ispirant a su riformismu. De seguru però sos diàrios italianos, belle semper provintziales e faulàrgios, ant chircadu de presentare su risultadu de sas eletziones a manera istrumentale e "cumbeniosa". Su chi si remarcat in Italia de su sutzessu sotzialista ispagnolu est su bipolarismu chi faghet passos a in antis petzi ca como est su tema primorosu de sa dibata polìtica in su "Bel paese". In realidade, pro chie connoscat e sigat sas peleas de s'istadu ispagnolu, sa polìtica de Zapatero s'est distinta pro duos sinnales fortes: deretos tziviles e istatutos regionales. 

Pro su chi pertocat su primu tema, su leader de su partidu sotzialista binchidore no at mai timidu de gherrare contras a sa parte prus reatzionària de sa Crèsia Catòlica pro defensare sa laitzidade de s'istadu, sa libertade de procreatzione assistida e sas uniones de sos omosessuales. A nudda sunt serbidas sas manifestatziones contra a su Guvernu organizadas dae pìscamos e Opus Dei.

Faeddende de su segundu tema bastat a nàrrere chi Zapatero at adduidu a s'aprovu de s'istatutu nou de Catalùnia e a totu sas polìticas linguìsticas e identitàrias de Euskadi, Galìtzia, e de sa matessi Catalùnia, mustrende aficu finas pro Navarra, Aragona, Astùrias e Baleares. S'ùnicu lìmite chi at postu est istadu cussu de s'integridade de s'Istadu in su rispetu de limbas e identidades de sas àteras natzionalidade presentes in intro de sas làcanas de s'Ispagna. 

Est su federalismu ispagnolu, chi si diat pòdere mutire "asimètricu". Poderes e medidas locales diferentes, pro situatziones diversas.

Custu at fatu balangiare, petzi pro fàghere un'esempru, a su PSOE 25 chimbe deputados in Catalùnia chi sunt detzisivos pro sa majoria in sas Cortes de Madrid. Sos partidos natzionalitàrios de inclinu moderadu (sa catalana CiU e su Partido Nacional Vasco) ant poderadu e crèschidu unu pagu. Sos indipendentistas de ERC e àteros estremistas ant minimadu. 


Su diàriu de Bartzellona "Avui" at tituladu oe chi "El PSOE guanya gràcies a Catalunya" e su matessi El Pais, diàriu de giudu de Madris, atrogat chi <...en la próxima legislatura, los socialistas necesitarán en cada votación el apoyo de al menos siete diputados de otros grupos para sacar sus leyes y proyectos adelante. Tienen a su disposición variadas alternativas para conseguir este número...>. E sas alternativas "variadas" sunt mescamentes sos catalanos e sos bascos. 

Sa polìtica aberta e identitària de Zapatero at premiadu finas su PSOE in Catalùnia chi at leadu su 45% de sos votos. No est malu pro unu partidu sotzialista, finas pro chie (galu intro de sos intelletuales sardos) naraiat chi sos catalanos nachi fiant unu paru de nazistas e leghistas. 


In Itàlia in tames su "riformismu" de sas elites est contra a sos deretos tziviles de sos "diferentes" e de sas "minorias". Sa Manca est imbenugiada a dae in antis de una Crèsia chi si interessat prus de sessu chi non de caridade. Non si ratìficat galu sa Carta Europea de sa Limbas e si impugnat una lege moderada comente cussa de su friulanu. 

Una bona parte de sas classes dirigentes locales sighit bene custu annestru e est galu cumbinta chi un'istadu tzentralista e natzionalista comente cussu italianu potzat dare respostas uguales a situatziones disuguales. Su federalismu est semper prus ismentigadu, mentres si faeddat petzi de sos islogan leghistas. 


Finas in Sardigna, sas elites nurdiadas dae pane e ideologias de custa Itàlia provintziale (ismentighende sos chi nùmenant finas a fitianu Gramsci, Lussu, Bellieni, Asproni) faghent una gherra propagandista contra ogni sungurtu de identidade linguìstica ufitziale o federalìstica.


Impreant su podere iscientìficu comente illùinu. Ant fatu su 68, sunt istados marxistas tzinesos o sovièticos, ma in realidade sunt comente sa Crèsia reatzionària in Ispagna: tzegos, disonestos e interessosos. Si nde birgòngiant de èssere sardos, friulanos o otzitanos e timent sos chi sighint custas traditziones ca los iscàndulant.

Comente pìscamos iscurigosos de s'incuisitzione moderna contra a sos deretos tziviles de sos "diferentes". 


Pepe Coròngiu 








  




 

 
 
 

 

 
diariulimba@sotziulimbasarda.net  © sotziulimbasarda 2004-2008,"e' vietato riprodurre articoli originali o estratti da questo sito senza l'assenso della direzione"