Tore Cubeddu diretore ufìtziu limba sarda de Aristanis

S’Amministratzione provintziale de Aristanis, cunforme a sa Lege 482/99 Normas in matèria de tutela de sas minorias linguìsticas istòricas, in su 2004 at istituidu s’Ufìtziu de sa Limba e de sa Cultura Sarda chi traballat pro favorire s’usu de su sardu in ogni setore e pro su prus, comente narat sa Lege, in s’Amministratzione Pùblica. Unu cursu de formatzione at a incomintzare chenàbura 9 martzu, in su Tzentru de ispiridualidade Nostra Sennora de su Rimèdiu de Donigala Fenughedu, cun unu seminàriu propedèuticu e at a sighire cun bìndighi mòdulos de trinta oras de letzione e laboratòriu de limba sarda chi ant a èssere fatos in sos Comunes chi ant aderidu. 





Lege 482/99 – Sa Lege 482/99 permitit de impreare su sardu, comente sas àteras limbas de minoria reconnotas dae s’Istadu italianu, in s’Amministratzione Pùblica e in sas iscolas, dende·ddi gasi una dignidade chi prima non teniat e sa legitimidade ufitziale. Su Cussìgiu de sos Ministros pro chimbe annos podet finantziare sos cursos de formatzione pro preparare sos dipendentes de s’Amministratzione Pùblica, sos isportellos linguìsticos e sa comunicatzione in sardu in sos mèdios de comunicatzione: giornales, televisione e radio. Sa Lege 482/99 decrarat chi s’Istadu Italianu tenet comente limba ufitziale s'italianu ma promovet fintzas sa valorizatzione de sas limbas e de sas culturas de sas populatziones albanesas, catalanas, germànicas, grecas, islovenas e croatas e de sas chi faeddant su frantzesu, su francu-proventzale, su friulanu, su ladinu, s'otzitanu e su sardu.



De sos 88 Comunes de sa Provìntzia, 80 ant pedidu a su Cussìgiu provintziale e otènnidu de èssere includidos in su territòriu postu a tutela pro sa limba sarda. 



Coordinamentu pro sos cursos de formatzione e sa comunicatzione in sardu – De sos 35 Comunes chi ant retzidu su finantziamentu pro s’annu 2004, paris cun s’Amministratzione provintziale 29 ant fatu unu Coordinamentu pro sos cursos de formatzione e sa comunicatzione in sardu. De su coordinamentu faghent parte sos Comunes de Albagiara, Ales, Ardauli, Asuni, Bidonì, Bonarcado, Cabras, Curcuris, Fordongianus, Ghilarza, Gonnoscodina, Gonnosnò, Laconi, Modolo, Mogoro, Montresta, Oristano, Paulilatino, Samugheo, Scano di Montiferro, Sedilo, Senis, Solarussa, Terralba, Tinnura, Ula Tirso, Usellus, Villaverde, Zerfaliu.



Isportellos linguìsticos – Custos Comunes ant giai apertu sos isportellos linguìsticos comunales in ue traballant sos operatores chi tenent s’incàrrigu de pònnere in sardu sos documentos e sas comunicatziones de sas amministratziones e de sensibilizare sa gente pro faeddare in sardu de totu e in totue. 

In sos chimbe annos de finzantziamentu sos dipendentes de sos Comunes ant a dèpere èssere preparados pro sighire apustis a iscrière sos autos amministrativos in sardu, mancari chi abarrent legitimos cussos iscritos in italianu.



Cursu de formatzione – Su cursu de formatzione at a incomintzare chenàbura 9 martzu, in su Tzentru de ispiridualidade Nostra Sennora de su Rimèdiu de Donigala Fenughedu, cun unu seminàriu propedèuticu e at a sighire cun bìndighi mòdulos de trinta oras de letzione e laboratòriu de limba sarda chi ant a èssere fatos in sos Comunes chi ant aderidu.. Sos reladores, professores e espertos de polìtica linguìtica chi ant a partetzipare a su seminàriu, ant a faeddare de su traballu fatu fintzas a oe dae sa Regione Sarda, de comente sighire a su mègius sa lege, pro nde tènnere benefìtziu mannu, de poite est cosa de importu no ispèrdere sa limba sarda e ite si est faghende e si est fatu in àteros logos de s’Itàlia cun àteras limbas de minoria. 



Sos cursos ant a èssere in Albagiara pro sos dipendentes de sos Comunes de Albagiara, Gonnosnò, Usellus, Villaverde; Mogoro; Solarussa pro sos dipendentes de Solarussa e Zerfaliu; Oristano pro sos dipendentes de su Comune, de sa Provìntzia e de s’Ufìtziu de sas Intradas; Bonarcado pro sos dipendentes de sos Comunes de Paulilatino e Bonarcado; Modolo pro sos dipendentes de sos Comunes de Modolo, Montresta, Scano di Montiferro, Tinnura; Curcuris pro sos dipendentes de sos Comunes de Curcuris, Ales e Gonnoscodina; Senis pro sos dipendentes de sos Comunes de Laconi, Asuni, Senis; Samugheo pro sos dipendentes de sos Comunes de Samugheo, Fordongianus e Ula Tirso; Terralba; Cabras; Ghilarza pro sos dipendentes de sos Comunes de Ghilarza, Ardauli, Sedilo e Bidonì. 



Sas matèrias e sos professores ant a èssere:

Linguìstica sarda e Linguìstica generale (4 oras pro ogni mòdulu) – Giovanni Lupinu e Nicoletta Puddu; Geografia linguìstica de sa Sardigna (2 oras pro ogni mòdulu) – Maria G. Cossu; Ortografia de sa limba sarda, Limba Sarda Comuna e variedades locales (4 oras pro ogni mòdulu) – Gianfranca Piras e Michele Ladu; S’italianizatzione de su sardu e s’italianu regionale (2 oras pro ogni mòdulu) – Antonello Garau; Polìtica linguìstica e normativa de sas limbas de minoria (4 oras pro ogni mòdulu) – Simona Corongiu e Gianluigi Stochino; Istòria de sa Sardigna e de sas Istitutziones giurìdicas de sa Sardigna (4 oras pro ogni mòdulu) – Stefano Pira e Maurizio Casu; Limbàgiu giurìdicu – amministrativu (2 oras pro ogni mòdulu) – Giuseppe Corongiu; Laboratòriu (8 oras pro ogni mòdulu) – Gianfranca Piras, Michele Ladu, Iside Zucca, Antonio Maria Pala.



Sos chi ant a partetzipare a custu cursu, chi pro sa prima borta in Sardigna ponet paris tantos entes, sa Provìntzia, sos Comunes e s’Ufìtziu de sas Intradas de Aristanis, ant a èssere treghentos.



Ant a cumpletare su calendàriu de su cursu deghe seminàrios ispetzìficos: Limba sarda e…literadura e poesia, Limba sarda e…sa promotzione de sa cultura sarda, Limba sarda e…sos àutos amministrativos istòricos in sardu, Limba sarda e…unu ditzionàriu pro s’Amministratzione Pùblica, Limba sarda e… Crèsia, Limba sarda e… sa situatzione linguìstica in Sardigna, Limba sarda e… sos mèdios de comunicatzione, Limba sarda e…s’italianu, Limba sarda e…sa Carta de Logu, Limba sarda e…sos Ufìtzios linguìsticos.



Sos tzitadinos interessados a partetzipare a su cursu de formatzione si podent iscrìere, comente uditores, o pedire informatziones a sos isportellos linguìsticos comunales o a s’Ufìtziu de sa Limba e de sa Cultura Sarda de sa Provìntzia de Aristanis (0783 3683 203, ufitziulimbasarda.or@tiscali.it). 



S’Amministratzione provintziale de Aristanis

S’Ufìtziu de sa Limba e de sa Cultura Sarda