Unu istadu nou s’acherat in su mundu a pustis de cussu de su Kosovo, unu istadu nou cun petzi 57 mìgia (!) abitantes e una capitale, Nuuk, chi nde tenet 15 mìgia. Sa Groenlàndia at torradu a iscobèrrere sa cultura natzionale sua e la cheret amparare, issa, sa prima natzione eschimesa. “Amus imbentadu nois sos igloo, sos kayak, s’eskimo, e belle∙belle in Europa e Copenaghen nos bident galu che bàrbaros”. 

Emmo, sa madrepàtria Danimarca at a lassare votare pro su referendum chi l’at a pòdere fàghere pèrdere su 98% de su territòriu suo colonizadu, e in ie in s’àstragu de semper, intre focas e balenas, in ue curriat “Su sensu de Smilla pro su nie”, fintzas una limba eschimesa at èssere ufitziale. S’ex potèntzia coloniale at a lassare duncas s’ìsula prus manna de su mundu cantu a ses Germanias postas paris ma cun pagos abitanes autoctonos tantu chi sa capitale tenet petzi duos ristorantes de grabu. Ma s’ischirriadura est giai comintzada cun sa firma intre su premier cunservadore danesu Anders Fogh Rasmussen e cussu sotzial-democràticu de sa Groenlàndia Hans Henoksen. 

Petròliu bundante e àteras materias primas ant a agiudare sa soberania:”Ca cussas resursas sunt sas nostras e tocat de las amparare” ammentat Enoksen. Ma no est petzi una chistione de dinari, est mesche una cultura natzionale torrada a iscobèrrere, a tesu meda dae cussa rapresentada dae sos danesos. E si su nùmeru de pessones de s’istadu nou ponet dudas subra sa formatzione de una classe dirigente intre sos giòvanos essint a campu figuras noas che a su manager Bjarke de Renouard danesu ma cojuadu cun una groenlandesa. De sa limba locale no ischit meda ma sos fìgios la manigiant bene:” est s’identidade de su benidore issoro” chi torrat finas mègius de:”est su benidore de s’identidade issoro”.