In Casteddu, Gerd Harms de s'Educ, presente su Presidente de sa Regione Renato Soru, at sutalineadu s'importàntzia de imparare non tantu unu "inglesu-esperantu", chi annuddat sa richesa e s'afinu de sas limbas sìngulas, ma de valorizare sa limba materna de ognunu e acostare a custa nessi àteras duas limbas istràngias. S'esempru dèchidu de s'Islovènia, in ue sa gente faeddat a fitianu bator o chimbe limbas, cunservende s'islovenu comente limba de base. 


CASTEDDU, 30 ABRILE 2008 - S'est faeddadu mescamente de chirca e annoamentu tecnològicu, multilinguismu e comunicatzione in sas setziadas de traballu de s'Educ, sa commissione "Cultura e Istrutzione", organismu de su Comitadu de sas Regiones fundadu in su 1994 dae su tratadu de s'Unione Europea, riunidu custas dies coladas in Sardigna. 

In una cunferèntzia pro s'imprenta organizada eris in Casteddu, su presidente Gerd Harms, in cumpangia de su Presidente de sa Regione Renato Soru, ant bogadu a craru s'argumentu de primore de s'initziativa, chi fiat "su triàngulu de sa connoschèntzia": istrutzione, annoamentu e chirca", su motore verdaderu de s'isvilupu econòmicu. A custu s'est annantu su chi est naradu in custas dies pro su chi pertocat sas reformas pro sas telecomunicatziones, sa revolutzione digitale, sos mèdios e sos contenutos on line, su multilinguismu. 

Pro su chi atenet a su multilinguismu, Gerd Harms, at sutalineadu s'importàntzia de imparare non tantu unu "inglesu-esperantu", chi annuddat sa richesa e s'afinu de sas limbas sìngulas, ma de valorizare sa limba materna de ognunu e acostare a custa nessi àteras duas limbas istràngias. In custa punna, Harms at ammentadu s'esempru dèchidu de s'Islovènia, in ue sa gente faeddat a fitianu bator o chimbe limbas, cunservende s'islovenu comente limba de base. Custu, a bisu de Harms, diat èssere finas su parre de majoria in sa dibata interna a su Comitadu de sas regiones. 

Su Presidente Soru at naradu chi sa Regione Autònoma de sa Sardigna chircat de sighire custa lìnia de s'Unione Europea e, dae pagu tempus, at dedicadu sa Die de sa Sardigna, festa natzionale de su pòpulu sardu, a sa chistione de sa limba locale. Soru at chertu ammentare sa pessone e sa figura de Mario Melis, giai Presidente de sa Regione e cumponente de su Parlamentu europeu, "federalista cumbintu", chi, a inghitzu de sos Annos Noranta, fiat istadu unu de sos fundadores de su Comitadu de sas Regiones. 

Difatis in sos ùrtimos tempos sa UE torrat a valorizare su multilinguismu e cussìgiat de imparare sa limba materna e de "adotare" un'àtera limba. S'agatant custos meledos in un'istùdiu fatu dae unu grupu de intelletuales ghiadu dae s'iscritore libanesu Amin Malouf, presidente de su grupu de traballu subra de su diàlogu interculturale. Sa commissione at presentadu s'istùdiu carchi mese como mostrende comente sa moltiplitzidade de limbas diat pòdere agiudare s'afortiamentu de s'Europa e finas èssere unu puntu de partèntzia pro sas autoridades comunitàrias e istatales in ideas de initziativas legislativas bendoras. 

S'idea tzentrale de su documentu est chi sa UE e sos istados membros favoressant in sas iscolas issoro una "limba personale adotiva". Cunforma a custa idea, ogni tzitadinu europeu diat dèpere èssere ispìnghidu a seberare in manera lìbera una limba distintiva, diferente dae sa limba identitària e dae sas limbas internatzionales de comunicatzione. 

Sa relata de su grupu de espertos adduit chi su de "...amparare totu sas limbas de su patrimòniu nostru, finas sas limbas antigas comente su grecu e su latinu, e favorèssere s'estensione issoro in su restu de su Continente, finas sas limbas de minoria, sunt aspetos de intragnas de un'Europa de paghe, cultura, universalidade e prosperidade". 



artìculu leadu dae su giassu de sa Regione Sardigna

http://www.regione.sardegna.it/j/v/25?s=80983&v=2&c=220&t=1