L'aiat naradu Giròmine Araolla in su 1500 chi paritzos intelletuales sardos in tames de arrichire e magnificare sa limba nostra, si dedicaiant a sas furisteras. Mescamente a s'ispagnola e a s'italiana chi de seguru non teniant a bisòngiu de custu donu de sos sardos pro èssere mannas. Custa gente, naraiat Araolla, cheret "Dare lughe a su sole", chi est una manera atzuda ma galana de ponnere in craru s'inutilidade de su traballu de chie si birgòngiat de èssere sardu. 


Si nd'est faeddadu in duas ocasiones diferentes, sas dies coladas, cun duos autores chi a Araolla ant dedicadu istùdios e libros. In Fiolinas, su 10 de maju, cun Maurizio Virdis, chi de pagu at publicadu sas "Rimas diversas spirituales" e cun Micheli Pinna chi aiat publicadu carchi annu como su poema de Araolla intregadu a Gavinu, Protu e Gianuario. Ambos ant reconnotu sa grandesa de su traballu de s'iscritore tataresu chi at printziapidu su rennou e s'amodernamentu de sa limba sarda.


In Fiolinas s'istitutu cumprensivu iscolàsticu aiat organizadu pro sa de oto bias sa "Die de sa limba sarda" cun duas dies de istùdios e sàgios finales de sos pitzinnos chi ant istudiadu sa limba sarda in s'oràriu curricolare. Sa segunda die relatores fiant Maurizio Viridis e Giuseppe Coròngiu. Su primu at faeddadu de Araolla, su segundu de sos problemas de impreu de una limba giurìdicu-amministrativa. Unu tema prus fàtzile de iscaretzire cando si connoschet su traballu terminològicu e normativu de Araolla. 


Una chida in fatu, in sa biblioteca comunale de Tàtari, si sunt adobiados Micheli Pinna, professore a cuntratu de literadura sarda de s'universidade de Tàtari, semper cun Giuseppe Corongiu, ma custa bia pro presentare su romanzu de Micheli Ladu, "S'arvule de sos sardos", imprentadu dae Condaghes, pro sa rassigna Martislimba. A parte sos reconnoschimentos a s'òpera de Ladu, sa chistione est torrada a lòmpere subra su traballu de Araolla, autore chi su movimentu linguìsticu est torrende a fortunas noales. 


S'approssimatzione a una limba comuna de totu sos sardos tenet unu babbu mannu lùghidu in "Giròmine Nostru" chi at aprontadu unu modellu linguìsticu chi sinnat posca totu s'isvilupu de sa literadura sarda in sos sèculos in fatu. Finas su primu e prus mannu poeta campidanesu Salvador Vidal, ismentigadu e postu bandu ca istrobbat calicuna ricostrutzione istòrica, sighit su modellu de Araolla. Sa prosa gasi narada "campidanesa" naschet in realidade pro "imitare sa realidade" non pro fàghere una limba arta e comune, mescamente cando sessat su bisu de una limba e natzione sarda. Corongiu at annontziadu chi custa interpretatzione de sa literadura sarda at a èssere presente in su libru nou suo chi est essende. 


Micheli Ladu, presentende su libru suo, at naradu, faghende a cumprèndere chi non lu diat fàghere prus, chi est iscritu in "micheliladesu", unu idioletu pessonale chi chircat de mediare intro sa faeddada naturale de Ollolai e una grafia chi punnat "timidamente" a èssere comune. In custa situatzione sunt belle totu sos iscritores in limba sarda chi ant ismentigadu de èssere parte de una limba e iscrient in unu "dialetu-idioletu" pessonale issoro. 

Custa est a su matessi tempus sa richesa e su lìmite de sa literadura nostra chi at bisòngiu de àtera lughe. 


Leghe finas

http://www.istituto-bellieni.it/pubblicazioni.html

 http://www.filologiasarda.eu/catalogo/autori/autore.php?codice=a31558

http://www.sardegnacultura.it/j/v/253?s=20363&v=2&c=2695&c1=2739&visb=&t=1

http://cgi.ebay.it/Sa-vida-su-martiriu-et-morte-de-Girolamo-Araolla_W0QQitemZ270228304516QQihZ017QQcategoryZ83210QQcmdZViewItem#ebayphotohosting

http://www.lefweb.it/index.php?sez=2&arg=1&txt=1&son=1&id_doc=133

 
S' ISTITUTU CUMPRENSIVU DE FIOLINAS

pro

Sa de otto dies de sa Limba Sarda



CUMBIDAT 



a unu semenariu didaticu intro de sas atividades de su progetu de limba sarda 

“Faeddare su sardu pro istare in Europa”

(finantziadu cun sos fundos de sa lege n. 482 de su 15/12/1999)

Chenaura 9 e Sapadu 10 de Maiu de su 2008 a sas battor de sero

In s'auditorium de sas Iscolas Elementares de Fiolinas



PROGRAMMA

Chenaura 9 de Maiu



 Saludu de su Dirigente Iscolasticu, dott.ssa Natalina Capula.

 Saludu de su Sindigu de Fiolinas, dott.ssa Giovanna Sanna.

 Legen sas poesias issoro sos pitzinnos de sas Iscolas Medias de Fiolinas.

 Relassione de su prof. Micheli Pinna, diretore de s’ Istitutu de Istudios e Chircas “Camillo Bellieni” de Tatari, in punta de “Sa poesia a bolu e sa limba sarda”.

 Presentan su tribagliu de s’Iscola de sos Minores de Codronzanu e de Fiolinas e de sas Iscolas Medias de Fiolinas sas mastras:

Bitoria ‘e Campu

Rosalia Truddaiu

Giuanna Maria ‘e Ledda

 Relassione de sa prof.ssa Maria Antonietta Dettori, chi at imbinzadu s’istudiu de sa limba sarda in sas Iscola Medias de Fiolinas, in punta de “Sa limba sarda in iscola”.

 Relassione de su dutt. Anghelu Pisanu, musicologu, in punta de “Sos istrumentos de sa tradissione sarda: istoria, ammanizu e impreu”.

 Arreionada.

 Tancada.

Contivizat su semenariu sa prof.ssa Maria Antonietta Dettori 





Sapadu 10 de Maiu



 Saludu de su Dirigente Iscolasticu, dott.ssa Natalina Capula.

 Cantan sos pitzinnos de sas Iscolas Elementares de Fiolinas.

 Relassione de su prof. Mauritziu Birde, mastru de Filologia Romanza e Limbistica Sarda in s’Univessidade de Casteddu, in punta de “S’importantzia de Ziromine Araolla pro sa limba sarda”.

 Relassione de su dutt. Zusepe Coronzu, presidente de su Sotziu Limba Sarda e diretore de s’Ufisciu Limbisticu Regionale, in punta de “Sa limba sarda in s’amministrassione publica”. 

 Presentan su tribagliu de sas Iscolas Elementares de Codronzanu, de Fiolinas e de Muros sas mastras:

Maria Antonia Pais

Annalisa Andreini

Istevanina Mura

 Tancada.