Finzas s’Ozzastra tenede unu premiu litterariu in limba sarda. Dae un’istudiu urtimadu dae pagu e fattu dae Sarbadore Tola, autore de medas liberos, pro sos chinbant’annos de su premiu “Ozieri”, est bessidu a foras chi mai s’Ozzastra hat tentu unu premiu litterariu in sardu. S’unica esperienzia segnalada est istada “Istillas de lentore” de Ulassa, cuncursu fattu in su duemizzaechinbe. 



Dopo duos annos s’associazione culturale ulassesa “Sa perda e su entu”, chi had organizzadu sa gara poetica, hat decisu de faghere, cun s’azzudu ‘e su Comune ‘e Ulassa, sa segunda edizione de su premiu.



Ideadu pro dare ‘oghe a su discursu subra sa limba sarda e sa cultura de sa nostra identidade, su premiu “Istillas de lentore”, riservadu in sa prima edizione a sa sola provinz’e s’Ozzastra, hat cust’annu allargadu sos confines a totta sa Sardigna e a tottu sos poetas ed appassionados residentes finzas fora ‘e s’Isola. 



S’anima ozzastrina de su premiu est comunque abbarrada ancora ‘ia e had ispintu sos organizzadores a riservare una sezione solu pro sos poetas ozzastrinos e pro chircare de ispronare una terra chi non connosched medas cuncursos de poesia a faghere comente si faghedede in ateros logos e chircare de azzuare sos poetas locales, chi non sun pagos, a partezipare a manifestaziones de custu tipu. 



Sa poesia improvvisada est in calu e non si vived prusu comente atteros tempos cando fid intesa ed isettada comente una de sas cosa prus importantes de sas festas de onzi ‘idda. In mesu a custu calu ‘e attenzione hant cominzadu a si biere, unu pagu in tottue, sos primos premios de poesia iscritta a taulinu. Custos premios, a cominzare dae cussu ‘e Ozieri, si sun bidos naschere in tottu sar biddas ed oe sunu diffusos in donzi logu. 



Cun su passazzu dae sa oralidade de una cultura ancora pagu alfabetizzada, comente fidi in su cominzu de su seculu passadu, si est bida sa naschida de sos improvvisadores mannos chi sun passados, dae sas primas garas chena ‘inari, chi si faghian solu pro piaghere e pro una manigada parisi sa die ‘e sa festa, a sas garas prusu organizzadas chi amos connottu finzas a oe.



Oe sas garas improvvisadas sunu preò unu pagu in crisi e sos appassionados sun cominzande a s’istraccare de unu modu de faghere poesia unu pagu ai cussu ettu. Nois pensamos chi sas garas de poesia a taulinu, propriu ca prus regionadas, forzisi, sunu prus addattas a cumponnere rimas cun d’unu pagu ‘e prus attenzione e sighinde una vena poetica prus precisa ed intesa cun totu sos sentidos. A bortas zertos poetas improvvisadores prus chi poesia parene cumponner versos. Faghene torrare certu sa rima e sa metrica ma sa poesia no est solu rima e metrica ma est cussu carchi cosa chi faeddada intro ‘e su sentidu de sa zente. Est unu faeddare pianu chi narad meda prus cosas de cussu chi naran sas peraulas. Est unu modu de intender sa vida e sos sentimentos prus profundos de su genere umanu. 



Pro custu, creimos nois, sa poesia improvvisada est una pagu in crisi ed hat perdidu, in custos annos, parte de s’importanzia chi teniad, e pro custu amos decisu de indire, in mesu a sos montes de s’Ozzastra, unu premiu poeticu in limba. Una poesia però prus autentica. Istudiada e pensada ‘ene prima de esser nada. Ecco comente semus arrivados a “Istillas de lentore”. Cunvintos chi sa vera natura de su populu sardu non si podet cancellare e non podet rischiare de si perdere intro ‘e sa globalizzazione mondiale. Est una falsa modernidade chi distruidi onzi cosa chena salvare cantu de ‘onu b’ad in su nostru passadu.



Istilla de lentore, comente tottu sos premios de poesia sarda, si poned a difesa ‘e sa identidade de un’isola a borta disprezziada e irmentigada dae sos matessi abitantes chi rischiana onzi die de perdere sa identidade e finzas s’ammentu de unu populu e de una cultura millenaria. 



Istillas de lentore est unu azzudu chi si pedidi a tottu sos poetas, istudiosos ed appassionados pro difendere un’isola chi, cun forza, orgogliu e coraggiu, chircamos, tottu paris, de accumpanzare a un’incrasa chena irmentigare sas nostras raighinas e chena nos confundere cun modellos de ateros logos e identidades chi no appartenini a sa nostra tradizione.



Pro finire, però, si er beru chi non poded esistere unu futuru chena passadu er beru finzas chi solu sa maturidade de unu populu chi lead forza e sustanzia dae sas propriar raighinas podede puntare ad un’incrasa chi resessada a si liberare dae cuddor ligazzos chi nos impedini de appompiare sos ateros a fronte arta. Pro si ponnere in su mundu cun sa forza de sa propria identidade cunvintos chi sa tradizione, si intesa in su modu chi intendimos, non est unu limite ma unu forza in prus chi nos azzuada a essere modernos e, in su matessi tempus, antigos. Guai ad abbarrare troppu ligados a s’antighidade chena appompiare cun ogros limpidos e coraggiosos a s’incrasa. Custu, in urtimu, est su coro de Istillas de lentore, non solu poesia, non solu rimas o metrica, ma forza e orgogliu de unu populu e de una cultura chi est arrivada s’ora chi leede su destinu suo in manu pro si ponner comente protagonista in su mundu ‘e oe. 



Podene partecipare a su cuncursu tottu sos sardos residentes e nono e principalmente sos sardos emigrados e residentes in s’estero.

Sunu ammissas tottu sas calidades de poesia, finzas chena rima. 

Sas poesias deppene arrivare intro ‘e su 31 ‘e triulas 2007 a s’indirizzu: 



Ass. Cult. “Sa perda e su entu” – Ulassai c/o Biblioteca Comunale di Ulassai - c.so Vittorio Emanuele II, 73, 08040 Ulassai (Nu).



Pro ischire comente faghere a partezipare lezzere ‘ene su regolamentu ‘e su premiu chi si podede agattare in su situ web www.saperdaesuentu.it o pedidennollu in sa biblioteca comunale ‘e Ulassai – c.so Vittorio Emanuele II, 73. tel 0782/79149. 





Giuseppe Cabizzosu 

Presidente Ass. Cult. “Sa perda e su entu” – Ulassai

c/o Biblioteca Comunale di Ulassai

c.so Vittorio Emanuele II, 73

08040 Ulassai (Nu)

0782/79149 – 335/6929179

saperdaesuentu@tiscali.it