Comente narait su maiustru de chimica chi apo tentu in s'iscola superiore, su mundu est partziu in duas calidades de personas: bonos e malos, sos chi tenent gana de triballare, e sos mandrones. Cando d'iscurtaio medas bortas pentzaio chi fiat una manera de bier sa vida unu pagu estremista, ma como ddi depo giare arresone.

In sa "chistione de sa limba sarda", cumunintzande de sa LSC, si podet fagher su matessi resonamentu de su prof mentovadu in susu. Du at zente chi cheret chi su sardu non si che morzat e po cussu, cun sas ainas sotziulinguistas modernas, est provande a fagher crachi cosa. Du at attera zente chi aboghinat (meda bortas amplificau de sos mass media) a su scandalu nande chi sa Regione Autonoma Sarda, ogande a pizu unu standard burocraticu, o menzus diat a esser a di narrer "po sa burocratzia", cheret bochire sas variedades de su sardu. 

Tando su mundu est dividiu in duos de a beru? Gasi paret bistu chi sos segundos ischint chi sas variedades de su sardu no ant tzertu a morrer po cruppa de una limba sarda iscritta ma puitte sa zente no faeddat prus su sardu in domo (comente est bessiu a fora fintzas in Paule sabadu 5 de Maju). Ma du at zente chi est contraria a sa LSC e a sa politica linguistica de custa giunta puitte biet sa LSC comente una cosa artificiale, opuru du at zente chi narat: "est logudoresu". Ma comente at dimostrau Roberto Bolognesi sa LSC si acosta meda a s'abbasantesu, est a narrer in cussa logu linguisticu tzirriau "arborense".

Totus custas chircas po iscoberrer cale est sa variedade, cale funtis sas differentzias a intro de su sardu funtis de interesse mannu, ca bogant a pizu una manera de bier noa chi no siet sa divisione istorica logudoresu-campidanesu. S'unicu problema est chi sa LSC, sende una limba pro sos ufitzios, tando unu codighe artu e burocraticu, no at a essere manizada de sa zente comuna, tando at abbarrare, comente est zustu chi est, una limba iscritta e limitada a unu contestu ibia.

Est po cussu chi chie narat chi sa LSC at a ochire sas bariedades de su sardu, o est fainde su trasseri o no at arresonau bene. 

Su fatu chi sa zente comuna siet preocupada po sa politica linguistica est zustu. Ma unu contu est chi sa politica si ponzat a narrer comente depes faeddare , comente est sutzediu in Frantza cun sa "Loi Touboun", botzada pois de sa consulta, un ateru contu est a fagher politica linguistica po chi sa limba sarda tenzat unu status sotziulinguisticu differente (chi siet menzus de cussu como).

Su fattu chi sa Regione tenzat una limba ufficiale e chi bessant documentos iscritos in custu codighe, no podet fagher atteru che bene a totu sas varidades de sa limba sarda. 
Sa cosa paret istupida de narrer, ma su sardu, a paris de totu sas limbas clasifficadas comente "minatzadas", tenet su problema de sa trasmissione a sos pippios. E puitte sa zente no trasmittid prus su codighe a sos a fizos e nebodes? Ca in domo si faedat s'italianu e in s'iscola su matessi.E puitte? Ca su sardu non tenet unu status bonu. 

Si sa Regione biet custa cosa comente unu problema e cheret furriare sa realidade, po a mimi andat bene e pentzo chi sa cosa no mi cambiet meda si sa LSC asimizat a s'abbasantesu o a su busachesu. S'importante est a cumprender sa faina, diasiche podimos bier in presse, comente narait su Maistru, de cale parte istamos: pro o contra su sardu.


Lucio Angelo Porcu