Contados gasi, canteddu a sa grussa, sos resurtados de sa chirca universitària subra de sa limba sarda custu
bogat a craru: su 97 pro chentu de sos sardos o faveddant o cumprendent sas limbas de Sardigna. Petzi
a su 3 pro chentu o pro gosi o pro gasi no l'interessat. Su fatu istat, est pro custu tres pro chentus chi traballat sa sienda culturale e mediàtica in Sardigna.


Est a nàrrere chi dae s'universidade a sos giornales, dae s'iscola a sas televisiones, totu produint cultura
e informatzione faghende mustra chi su tres pro chentu de su pòpulu sardu siat sa maioria de sos sardos.
A podimus baiulare galu custu iscàndalu?

Ponimus a banda, pro como, sas istruturas istatales, universidade e iscola. Pro las mudare bi cheret un'atu
istitutzionale e legislativu comente podet èssere una Costitutzione sarda, in intro o in foras de sa 
Repùblica italiana non est como in arresonu. Ma b'at siendas privadas chi campant petzi ca sunt
aproendadas, die cun die, dae sa voluntade nostra de lis dare dinare: sunt sos giornales e sas
televisiones. 

Su chi so proponende est de torrare imposta a custa dimanda: "Podimus, su 97 pro chentu de sos sardos,
apretare sos editores a fàghere giornales e televisiones pro nois e non petzi pro s'àteru tres pro
chentu?" O, pro mègius nàrrere: "Si giornales e televisiones boicotant sa limba e sa cultura de su 97
pro chentu de sos sardos, podet custu 97 pro chentu boicotare a chie lu menisprètziat?"


S'imposta est prus traballosa e dìlica de su chi si podet pessare ma cheret dada.
Intantu, comintzamus a nàrrere chi diat èssere isballiada una reatzione mala a su chi sos mèdios de
imprenta narant: sa libertade issoro tenet nessi su matessi valore de su deretu de sa gente de los
criticare. Ma sa gente, pesso, tenet su deretu de protestare contra a chie negat s'informatzione e de li
fàghere pagare sa mancàntzia. 

Comente? Impreande sos aparitzos de su mercadu chi sos mèdios e totu bentulant comente pandela: si su giornale meu non
t'aggradat non mi podes imperare de lu mudare, ses tue chi podes cambiare giornale e nde podes comporare
un'àteru. Bene. E tanto arresonamus de una cosa cuncreta. De sos duos cotidianos sardos, unu, La nuova, at publigadu
bastante novas e siat de sa cherta de sas universidades e siat de s'addòviu de Paule. 

No interessat comente nd'at faveddadu, malamente a pàrrere meu, interessat chi sos letores de custu
giornale ant ischidu chi custa cosa est capitada. Totu s'àteru pertocat sa libertade de su giornalista chi
nd'at iscritu: lu si podet criticare ma nudda de prus. S'àteru cotidianu, L'Unione sarda, at istighidu sa
nova de sa cherta universitària in unu tituleddu sena contu nen capu e no at contadu nudda de s'addòviu de
Paule. Sos letores suos sunt istados irrobados, nonsunt istados a gradu de ischire it'est capitadu. Pro
issos no est capitadu nudda. At boicotadu, in fines, su deretu de su 97 pro chentu de sos sardos a
benefìtziu de s'àteru tres pro chentu.

Pro la fàghere curtza, su chi propòngio est boicotare
sos chi nos boicotant. Comente?

Pro cumintzare, iscriende mìgias de messàgios a editore e a diretore de L'Unione sarda protestande pro
s'irrobu de s'informatzione fatu dae su giornale. (Pro nàrrere: "Protesto contro lo scippo di informazioni
commesso dal suo giornale a mio danno: mi ha nagato di conoscere importanti notizie sulla sorte della lingua
sarda che i lettori di altri giornali hanno saputo").

E si non b'at remèdiu, de fàghere un'issòperu, una die cuncordada, non comporende s'Unione e comporande
un'àteru giornale.Si boicotant sos sardos, sos sardos boicotant su giornale.

Si podet fàghere?


Gianfranco Pintore
3493695809