Maria Antonietta Piga est sa diretora, giovana e finas galana, de s’ufìtziu de sa limba sarda de sa provìntzia de Nùgoro. Reghet s’incàrrigu cun modèstia (finas tropu) e cun su risu chi at semper pintadu in lavras. At mustradu a totus chi sa polìtica linguìstica si podet fàghere finas cun s’allegria e sena arrenegu e disaogu fitianu. 



Si b’at otighentos mìgias euros est unu contu. Si bi nd’at 30 mìgia, un’àteru. Est prus tostu a traballare gasi. Ma Maria Antonietta non si fritit. Gherrat. Punnat a in antis. In pagu prus de un’annu at ischidu collire un’eredidade non fàtzile e otènnere resurtados. Faina desemplada in su mundu de sa limba in ue sunt medas cussos chi tzarrant e pagos de a beru cussos chi ghelant. 



Est fìgia “d’arte”, si diat pòdere nàrrere, ca su babbu est un’iscritore e poeta de cuddos chi ant lassadu unu marcu malu a burrare in s’istòria de sa literadura nostra. Sa laurea umanìstica in s’universidade de Casteddu e su traballu in sa Illisso, una de sas domos editoras prus nòdidas de Sardigna, cumpretant unu curriculum chi nemos podet discùtere. 



B’at chertu passièntzia e tempus pro la cunbìnchere a si lassare intervistare, ca, comente nugoresa sìnchera, disìgiu de si pònnere a lughe pro de badas non nde aiat. 

Ma in finitia bi l’amus fata, o Mariantonietta...

Mancu male, mi!, chi seis passientziosos bois...

Ite ponet de “valore aggiunto” una fèmina chi reghet un'ufìtziu linguìsticu? 

No est fàtzile a rispòndere a custa pregunta, ca mancari siamus in tempos de pari oportunidades, tocat de nàrrere chi s’òmine est diferente dae sa fèmina. Àmbos depent bogare s’atza, depent èssere balentes a gherrare a s’istrumpa ca sa limba no est chistione fàtzile. Est sa manera de ammaniare sas cosas, de las pessare chi fortzis est differente… Comente in totu sas fainas de su restu. 

E tue ti ses agatada in sa tzitade tua a leare un’incàrrigu difìtzile pro comente l’at connotu sa gente in Sardigna in sos annos colados...

Non m’agradat a faeddare de su passadu o de àteras pessones. Penso chi siat semper mègius a faeddare cun sos fatos mostrende su chi s’ischit fàghere. Deo traballo e fatzo su mègius chi potzo, sos giudìtzios non m’agradat a los dare. Tocat a àteros. 

Comente reagit sa gente a sa Limba sarda comuna? 

In printzìpiu no est meda a favore ca pensat chi est una limba imbentada chi si depet faeddare. A pustis de àere naradu chi nemos depet pèrdere sa variante sua e chi sa Limba sarda comuna est una limba petzi iscrita pro sa pùblica amministratzione, a pustis de àere ispiegadu sas normas gràficas de s’iscritura e su mèdiu pro seberare sas paràgulas, tando la pompiant cun ogros diferentes. Pedint ispiegatziones e sunt prus moddes…

Curpa de sa disinformatzione? 

Tocat de nàrrere chi sa “disinformatzione” contat meda gasi chi su prus de sa bortas si faeddat de una cosa chi si connoschet pagu o fintzas nudda.

Finas a como, comente ufìtziu ghiadu dae tene, ite ais fatu? 

So intrada a traballare prima die de martzu 2006. Amus fatu s'atividade normale de consulèntzia linguìstica chi faghet onni isportellu. Amus sighidu su notitziàriu in sardu de su situ www.uls.it e cussu de s’emitente Radio Barbàgia. Amus fatu: agendas tascàbiles, mallietas iscritas in sardu, bussas in cotone e bustas cun versos de poetas famados, calendàrios, opùscolos enigmìsticos e su cartolàriu educativu pro pitzinnos “La terra delle buone cose” cun s’editore Giunti. 

Pro Nadale de s’annu coladu ais organizadu unu bellu cunvegnu tècnicu iscientìficu...

Emmo, fiat “Limba sarda, radichinas e frogheddas”. Aiant partetzipadu paritzos espertos e finas Angela di Loreto e Emanuela Pace de su Dipartimentu afares regionales de sa Presidèntzia de su Cunsìgiu de sos Ministros. Pro non nàrrere chi bi fiat Vittorio Dall’Aquila chi totu sos chi traballant in custu setore connoschent. 

Ma sas comunas de sa provìntzia bostra a bos sighint? 

Amus mandadu a in antis finas su protocollu pro s’annualidade 2003 cun totu sos entes chi ant aderidu. Nos ant versadu finas sas resursas de sos progetos issoro pro produire materiales paris in iscala prus manna e a prètziu prus baratu. Pro su 2006, cun esatesa su 7 de Cabudanni, sa provìntzia at firmadu cun totu sos entes interessados. Como amus a cumintzare nois puru a fàghere sa formatzione in collaboratzione cun sas universidades sardas e cun sa Regione. 

Un’atividade chi non sessat mai...

Non solu. Amus sighidu unu cursu de formatzione pro s’impreu de s’aplicatzione web “Fad” cun s’Open-lab de Carlo Zoli. Amus progetadu meda pro sos annos imbenientes: “ Sas àndalas de sa limba” in cunforma a lege 482/99 annualità 2006; Progetu integradu de disvilupu (PIT) “Le voci dell’identità”; progetu “ Vola maria” in cunforma a sa lege regionale 26/97; “Fainas a cumone” pro su Pianu Istratègicu provintziale. In fines “ Guvernare cun sa limba” pro sa lege 482/99 in s’annualidade 2007.

E no ais ismentigadu mancu is iscolas...

No. Amus collaboradu cun sa IV C de sas Iscolas Elementares Ferdinando Podda de Nùgoro pro su progetu in limba “Battaglia Nuraghe/Gherra Nurache” e cun s’asilu-nido “Primi Passi” pro unu cursu de prima alfabetizatzione linguìstica. In prus amus organizadu su cuncursu pro sas iscolas elementares in occasione de “ Sa die de Sardigna” – 28.04.2006, subra su tema “Deo faeddo su sardu ca… / m’agradat su sardu ca…”.

Ite podet rapresentare Nùgoro, in sa polìtica linguìstica, pro totu sos sardos? 

Nùgoro est istada sa prima bidda a àere impreadu sos finantziamentos de sa 482 pro cumintzare una politica linguìstica a craru. At dae semper su nùmene de bidda de cultura; est in unu territoriu chi no at pèrdidu s’identidade de sa limba, in ue si faeddat su sardu, unu sardu pedrale, ma chi cheret fintzas andare in antis, chi cheret abèrrere sa ghennas a sa modernidade. Subra 53 comunas de sa provìntzia, 47 ant aderidu a sa retza chi s’Amministratzione at ammaniadu pro su progetu de su 2007 de sa 482 e chi previdit s’impreu de sa Limba Sarda Comuna in sos atos amministrativos… 

Totu custu in pagu prus de unu annu? 

No isco ite ant fatu sas àteras provìntzias, ma mi paret chi sa de Nùgoro si potzat pigare a esèmpiu.