Torrende gràtzias a Battista Saiu chi nos l'at imbiada, custa chi publicamus est una preiga de don Ferdinandu Gallu, 
pàrracu de Pettinengo (Biella). Est s'ultima chi hat fattu pro sa festa de frade Nigolau de Gesturi in sa die de sa festa litugica de su biadu, a Bioglio (Biella) 
in ue b'hat una cappella dedicada a Issu (a frade Nigolau), cherfida dae sos nebobes suos chi si narant "Medda" comente Issu e chi istant in Continente. Dae parizzos annos, don Ferdinandu tenet una "dispensa" unu premmissu, dadu dae su piscamu de Biella
pro podere preigare in sardu, faghere sa "catechesi" in Limba pro sos Sardos de su disterru.




Sa prèiga 

Padre Larentu Cabiddu, chi fit in su cunventu de Casteddu umpare a frade Nigolau, narat chi unu die, su superiore padre Antoni l’hat nadu a frade Nigolau: “Beru este, frade Nigolau, chi sos padres bonos semus deo e isse. Sos atteros …” e isse l’at rispostu: “Omnis homo mendax”, Onzi homine este ingannu, este ingannadore, este faulalzu.

No hat rispostu cun peraulas suas, frade Nigolau; hat faeddadu cun sas peraulas de su Salmu chentu e bindighi (115), cun sa Peraula de Deus.

No fidi istudiadu, no fidi crèschidu pro faghere su preigadore, fidi unu frade de bertula, unu frade chircante.

E hat rispostu cun sa Peraula de Deus.

Cheret narrer chi sas pregadorias chi faghiat umpare cun sos frades e cun sos padres de cunventu no che li intraiant in d’una orija pro che li essire dae s’attera, ma che li si frimmaiant intro de sa conca, che li intraiant in su coro, finzas in su profundu.

E gai, no cun sa sapientzia de sos homines, ma cun sa sapientzia de Deus ischiat rispondere. 

De ite est fatta sa pregadoria de su Cristianu?

Babbu e mama nos hana insinzadu, nos hana imparadu sas pregadorias de narrer a su manzanu e a su sero.

Ispero chi no las ammentemus tottu cantas.

Sos padres e sos frades de unu cunventu, e sos prideros, pèro leggiana puru su breviariu, chi est fattu gasi de salmos, de sa Peraula de Deus; e Su Cunciliu Vaticanu Sicundu had invitadu puru sos Cristianos a narrere asumancu carchi parte de su breviariu: sas Laudes a su manzanu e su Pesperu a su sero.

No bos ispantedas de su chi bos so nende: b’hada Cristianos meda chi lu faghene onzi die e sunt babbos e mamas de familia, professores e istudentes, operajos e impiegados. Non costant meda sos libereddos de pregadorias, pèro, si pregas de abbereru, a pagu a pagu ti podet entrare sa sapientzia de Deus e tando faeddas no sa limba tua, ma su faeddu de Deus, Babbu Nostru tottu poderosu.

Sos fizos dae chie imparant e freddare? Dae sa babbu e dae sa mama. E tando nois, dae chie imparamus a freddare cun Deus? Dae Deus matessi, ca semus fizzos suos.

Su biadu Nigolau dae Gesturi, chi no fidi istudiadu e chi deviat narrer sos salmos in latinu, hat imparadu. Nois chi podimus pregare cun sos salmos puru in italianu, devvimus fagher che a isse.



don Ferdinandu Gallo