Respondo cun piaghere a su chi narat Cristanu Becciu a pitzu de su chi aio iscrittu sa chida passada in su Diariu Limba (Lsc: unu lèssicu ddue cheret. Cale?).Ma prima de intrare in sas chistiones chi mi agradandat, cherio preguntare a issu (e a sos atteros chi funtis de accordu cun issu) puitte est de refudare sa metatesi chi nde at bogau "fronesta" (chi est una variedade de su sardu meda prus connota de 'inestra e chi est umperada comente esempru fintzas in su documentu LSC).

No ischio chi in Ollolai si netziat 'inestra ma isco chi in medas atteras biddas si narat fronesta, e diasi tenimos unu muntone de metatesi comente das tenent totus sas limbas. A custu puntu potzo arresponder chi sa metatesi podet "assegurare s'identidade de sa forma sarda evitende assimìgios cun s'italianu modernu" comente narat Cristianu po sa "i" prostetica. Ma no seo de accordu po nudda cun cust'idea.

Si de identidade linguistica podimos faeddare, no est de certu cussa chi nde bessit cun sa differentzia cun s'italianu.

Tenimos 380 e prus identidade linguisticas, una pro dognia bidda, una pro dognia tzitade, e no b'at versu de seberare una cosa chi andet bene a totus. Tando deo seo "pessimista" e no bi creo a sa LSC? Mancu po nudda! Creo chi siet un'aina de importu chi siet a livellu simbolicu che praticu e pentzo chi est cosa normale chi sas regulas tenzat unu principiu de abritrariedade, mancari pitticca. S'importante est no faet passare cust'arbitrariedade comente beridade, fainde "slalom" in sos problemas. Tando non pentzo chi sa LSC podet essere unu pagu mezorada, comente mi paret chi epet nau Roberto Bolognesi de pagu, e, comente si narat: totu in cue si cheriant sos problemas!

Ma prus chi de lessicu como tocat a resonare a pitzu de in'ue da depimos impreare custa limba. Comente a nau Mauro Maxia (semper in su 'e Diariu Limba), su problema mannu como est cuddu de trasmitere su sardu a is pippios. Tando si podiat fagher una cosa diasi: fagher istudiare a sos pippios in sa limba de su logu posta a paris cun sa LSC. Est precisu narrer chi custu no cheret narrer chi sos istudentes depent istudiare a mala oza sa LSC, ma antzis chi podent ponner a cunfrontu sa limba issoro cun sa LSC. 

Un'atteru pranu in'ue sa LSC podet azudare sa limba sarda a esser prus biatza est cussu de sos mass media. Cun Zuseppe Coròrgiu (unu de sos pagus giornalista interessados a sa faina) est capitau de resonare a pitzu de linguagiu giornalisticu in sardu. Custu est una cosa de interessu, ma comente amos acraradu oe s'arrejonu si che frimat in pro-lsc e contra-lsc comente si custa limba fessit su fine e no su mediu.

Tando sa pregunta oe depet esser: cale lèssicu pro su giornalismu in sardu?


Lucio Angelo Porcu