Custa màrcia est contra a su sistema sotziueconòmicu impostu a sa Sardigna dae su colonialismu italianu chi pro su fatu chi punnat a tareas polìticas, prus a prestu che a tareas econòmicas, no at produidu prosperidade pro sos sardos ma at finas istrupiadu s’istrutura sotziale e culturale pro sighire cun is dannos ambientales a su territoriu nazionale de su pòpulu sardu. Una MARCIA ANTICOLUNIALISTA, duncas, contra a sa presèntzia e a s’atzione de s’aparadu coluniale italianu in Sardigna. 

Est s’aparadu coloniale italianu matessi, costituidu dae sas istitutziones de su Istadu e dae sa borghesia comporadora sarda, chi at impostu a sa Sardigna su mògiu de disvilupu suo pro nde distrùere su nostru (apitzigadu comente sottosviluppo) proite no orgànicu a sa italianizatzione, a sos interessos econòmicos de su capitalismu e a cussos polìticos de is partidos e sindicados italianos, sena issèberu de dereta o de manca. Pro su colunialismu italianu, su disvilupu suo si espressat in s’isrobadòrgiu de sas matèria-primas nostras e in s’industrializatzione a calesiat costu, mancare siat improdutivu.S’est cumentzadu a is annus 60 e gasi est sighende, comente si su prètziu pagadu (dae is sardos) pro su disvilupu angenu no esseret bastadu pro demostrare chi cussa genia de disvilupu est istada un’issèberu de machìmine chi at produidu poboresa e pisinu ocupatzionale, ferenadu su territòriu, mutzadu sas alas a sa vocatzione sinzilla de su hàbitat nostru e prenadu ospedales e campusantos de cristianos fortzados a bivere in su disvilupu angenu. 

Cantu est costadu, e costat a sa Sardigna, custu disvilupu angenu? Antes o pustis at a tocare a fàghere su contu, a donare unu balore a is risorsas finantziàrias ispèrdidas, a sos dannos a sa salude, a su territòriu, a s’economia, a s’aira, a s’abba e finas sos dannos culturales e psicològicos. Unos cantos de custos dannos sunt craros, àteros sunt cuados cun arte e galu àteros dannos sunt bìvidos intro de is famìgias e mancari no intrent in su bilàntziu aziendale e in su prodoto lordo, pesant cun graesa in is palas de su pòpulu sardu. Su Pòpulu Traballadore Sardu est ammarturadu dae unos cantos 15000 infortùnios de traballu a cada de annu, sena de cunsiderare cussos àpidos in su traballu cuadu.De ses traballadores unu est pisinadu. Is istipèndios sunt intra de sos prus minores de s’Europa, unos cantos 315.000 sardos bivent a intro de is lacanas de sa poboresa (1/5 de sa populatzione), su disimpreu de sos pitzinnos in paritzas cussòrgias est lompidu a barigare su 30% ….. e su benidore issoro est galu su disterru.Sas indùstrias bòfidas dae su colonialismu (ordimingiadas pro èssere in crisi fitiana pro pòdere manigiare su ricatu ocupatzionale sòlitu) tenent prus che ateru duas funtziones: cussa de si papare totu sa sienda finantziària sarda pro ingrussare su capitalismu italianu, a manera de impedire àteros tipos de investimentos dae parte de is impresàrios locales, e cussa de su ismaltimentu de is ferenos produidos dae su benessere de sa natzione italiana. 

In su PASTORIU – sos pastores sunt fortzados a campare intro de unu tipu de assistentzialismu cuncordadu pro issos dae duos componentes de sa borghesia comporadora, chi assegurat a is industriales casàrgios sa còmpora de su late a prètziu mìseru chi immìserat, e a sos partidos e sindicados italianos su cuntrollu clientelare de sa categoria pro mesu de su sistema de sas lemùsinas integrativas. Unu sindicadu italianu de sa categoria s’est fintzas atrividu a propònnere de giùnghere su late puru a sas matèria-primas chi su colunialismu italianu isrobat dae su territòriu sardu. In su MASSARIU – bastat a castiare su chi acadesset in Decimuputzu aunde un’àteru acòrdiu intras duos componentes de sos canes de suta mesa (cussos chi apartennent a sa polìtica e cussos chi apartennent a su sistema bancàriu) no at sceti distruidu aziendas pigadas a numene, ma at fintzas umiliadu is massàrgios sardos chi creende de si megiorare sunt istados improsados dae custos fatzendieres a camisa ìnnida chi ddos ant ghiados a bìere sas aziendas e sas domos issoro in bèndida a s’asta. Custos sunt is resurtados. Cussu mogiu de disvilupu at batidu sutadisvilupu e est isrobende, impoborende e ferenende sa Sardigna.Is tareas sunt faddidas? Pro sa logica de sa funtzione de su sistema coluniale nono! 

S’inefitzèntzia, mancari ammustrat su fallimentu de sas tareas decraradas, espressat issa etotu mètodu iscentìficu formidàbile e aina apropriada e efitzente pro poderare unu pòpulu in tzerachia. Unu sistema articuladu ma atzivu in cue istadu, capitalistos, dereta, tzentru, manca e manca estrema italianos, si sunt unidos in sa cunchista de sa sotziedade sarda sende seguros chi onniunu podet batire s’isrobadorgiu suo; a s’istadu si legìtimat s’atividade de integratzione natzionale de is sardos, a sos capitalistos sos cuntributos finantziados, a sa dereta e a su tzentru is carrotzones clientelares, a sa manca e a sos sindicados is operàrgios de atrupare, e a sa manca rivolutzionaria italiana s’isperu de sa rivolutzione proletaria. 

DE COLUNIALISMU SI MORIT; NOIS NON CHERIMUS MòRRERE DE COLUNIALISMU. Est ora chi su pòpulu nostru pighet in manu sos redinagros de su benidore suo e lu ghiet in ue cheret mègius, organizende una bia pro totu una economia produtiva e respetosa de s’ambiente nostru, unu cummèrtziu attivu e giuntu a sa produtzione, un’industrializatzione abista e cullegada a sa trasformatzione de sos frutos de sa terra nostra.Custu at a sutzèdere sceti cando nois sardos, totu paris, amus a aere s’atrivimentu de torrare in s’iscena de s’istòria e de fraigare su cras nostru cun règulas e leges nostras, cun rìtimos nostros e sighende is esigèntzias e isperas nostras cunforma a sos pranos chi no ant a èssere detzididos ne in Roma e nimanco in Milanu ma inoghe, in terra nostra! 

S’indipendèntzia natzionale est, onnia die de prus, no una optzione o una possibilidade che àteras, ma un’apretu dae sa cale no si podet fare de mancu pro sa sarbesa de su populu nostru 

Bustianu Cumpostu Coordinadore Natzionale de Sardigna Natzione Indipendentzia








SU 12 DE gennàrgiu DE SU 2008 MàRCIA CONTRA A SU COLUNIALISMU: MACUMELE-OTHANA-THINISCOLE 

ATòBIUS:

IN MACUMELE A ORA DE SAS 10 IN PRATZA EX MERCATO CìVICO IN OTZANA

A ORA DE SAS 14.30 IN PRATZA SAN NICOLA IN THINISCOLE 

A ORA DE SAS 18.30 IN VIA ROMA

A ORA DE SA 21 IN PRATZA PUXEDDU, IN THINISCOLE:PROIETZIONE VìDEO CUNTZERTU KENZE NEKE 2006