Su premiu “Istillas de lentore”, fundadu in su duemizzaechimbe dae s’associazione culturale “Sa perda e su entu” de Ulassa, est arrivada a sa segunda edizione. Naschidu comente premiu dedicadu a sa poesia ozzastrina, sa competizione poetica si est, cust’annu, allargada a tottu sa Sardigna e at registradu una partecipazione chi neunu de sos organizzadores ait potidu mancu immaginare. A cunferma de comente, nostante su declinu e sa crisi chi medas sinnalant, sa poesia sarda est ancora ‘ia e sentida cun sa mente e cun su coro, finzas in sas regiones prus perifericas, sun arrivadas a sa segreteria ‘e su premiu prus de chentu poesias dae onzi parte e logu.

Naschidu a sa muda, comente un’eventu limitadu a sa sola Ozzastra, una zona attesu dae sos centros prus importantes e attesu dae sos logos prus tradizionalmente attentos e appassionados a sa poesia sarda, su premiu “Istillas de lentore” est creschidu ed at bidu aumentare sa attenzione de sa zente tantu de cunvinchere sos organizzadores a la estendere a tottu s’isola.

Sa giuria, cumposta dae Giorgio Murino (assessore ‘e sa cultura ‘e sa Provinza Ozzastra), Bruno Agus (poeta improvvisadore ozzastrinu), Giampiero Cannas (istudiosu ulassesu), Diego Corraine (istudiosu e direttore de s’Uffiziu tortoliesu de sa limba sarda ‘e sa provinza Ozzastra) e Paolo Pillonca (istudiosu, giornalista e scrittore), hat cunferidu sa pramma ‘e sa vittoria de sa Sezione Regionale a su poeta ‘e Santulussurgiu Mimmiu Maicu pro sa poesia “Nues in s’orizzonte”. Su segundu premiu est istadu assegnadu a su poeta ‘e Selargius Luisu Suergiu pro sa poesia “Sa notte ‘e Santu Giuanni” e su terzu premiu est, invece, istadu dadu a su poeta ‘e Castelsardo Domenicu Mela pro s’opera “Sona chiterra mea”. S’attera sezione, dedicada a s’Ozzastra at cunfirmadu sos già premiados poetas de Osini: Silviu e Pietro Pili, chi ant iscrittu sas poesia “Pro unu giovanu defuntu” e “A riu Pardu”. Su terzu premiu est, invece, istadu attribuidu a sa poetessa de Lanusei Violetta Arangini pro sa poesia “Sabudu a notti”.

Sa cerimonia ‘e premiazione si est tenta su chimbe ‘e zennarzu in Ulassai. Hat partecipadu puru su tenore de Oniferi chi ada accumpanzadu sos poeta in sa recitazione de sa poesias chi ana partezipadu a su premiu. Sa parte prus bella de s’incontru est, infatti, istada cando sos poetas ant incantadu tottu sos presentes lezzinde direttamente, cun sa ‘oghe ‘e su sentimentu insoro, sas rimas chi ant cumpostu. 

Su premiu “Istillas de lentore”, mancari naschidu dae pagu, est infatti solu a sa segunda edizione, si imponede comente unu ‘e sos premios prus importantes, autorevoles ed attesos de sa Sardigna orientale e puntada a diventare unu de sos appuntamentos fissos de mazzore richiamu pro sos appassionados de poesia sarda.

Tottu sa poesias de custa, de sa prezedente e de sas ediziones chi ana a sighire, ana essere inseridas, cantu primma, in sa biblioteca digitale “Ichnussa”, atteru importante prozettu de sa associazione culturale “Sa perda e su entu” de Ulassa chi, cun su patrociniu ‘e sa regione Sarda, ha realizzadu su prus importante e interessante esempiu de biblioteca digitale de poesia in sardu. “Ichnussa”, chi podides agattare a s’indirizzu internet www.poesias.it, est, infatti, cun sas suas prus de tremizza poesias a como inseridas, sa prus manna biblioteca de poesia sarda esistente in su mundu e cuntenidi tottu sa produzione poetica sarda dae sas origines a su tempus nostru. Est, certu, ancora incompleta, cumpleta no ad’a esser mai, però est in continua creschida. A como possedidi quasi tottu sos classicos de sa poesia in limba e medas atteras cosas puru. 

Tottu sas operas podene essere lèzzidas a video, istampadas e irgarrigadas dae unu calisisias computer de ‘onzi parte ‘e su mundu. Unu regalu chi Ulassa e sa Sardigna, cun passione e orgogliu, ant cherfidu fagher a tottu sos suos fizos disterrados peri su mundu e a tottus sos istudiosos ed amantes de su sardu, de sa Sardigna e de sa sua millenaria e meravizzosa cultura comente patrimoniu de s’umanidade. Chi sa Sardigna non siad solu folklore, non siad ebbia nustalgicu ammentu de unu passadu antigu e irmentigadu ma vida noa chi si poned a costazzos de sa menzus modernidade, rispettosa de s’istoria, de sa cultura e de sas tradiziones de unu populu.



Giuseppe Cabizzosu

Presidente ‘e s’ass. cult. “Sa perda e su entu”

Ulassai

www.saperdaesuentu.it 

Associazione culturale

“Sa perda e su entu” 

e-mail: saperdaesuentu@tiscali.it