Giai chi semus in Carrasegare, in medas ant detzisu de si che caratzare. Sas campanas a mortu de s’ipocrisia sunt sonende in totu s’ìsula sende chi carchi die como Frantziscu Màsala puru si nch’est andadu. Comente Antonello Satta, Antoni Cossu, Gianfranco Pinna e àteros chi aiant dadu vida a cussa istajone de sos Annos Setanta de su sèculu coladu, de grandu importu pro nois, chi si naraiat “neosardismu”. 



Màsala, de cussu movimentu chi aiat singiadu s’iscoberta noa de sa limba sarda e su refudu de sas modernizatziones farsas de sa Sardigna, fiat istadu unu protagonista. S’ateismu contras a su “Deus Petròliu”, sa cultura de sos “bintos ma non cumbintos”, sas paristòrias de sos “laribiancos” fiant istadas ideas literàrias fortes finas a bènnere unu programma polìticu suo e de àtere. 



In su 1978 fiat istadu issu su presidente de su Comitadu chi aiat collidu mìgia e mìgia de firmas pro una proposta de lege a initziativa populare in defensa de sa limba. Rechesta chi at tentu respostas (partziales e deludentes) in su 1997 e in su 1999 ebbia. Finas pro custu, si naraiat, chi in sos ùrtimos annos su poeta e iscritore fiat iscontroriadu contras a totus e chi non bidiat bene totu su sistema polìticu, culturale, giornalìsticu sardu. 



Nointames custu, s’indùstria culturale regionale li tributaiat sèmpere onores e sas paginas de sos giornales prus mannos non mancaiant mai de li dare ispàtziu. Fiat un’òmine contras Frantziscu Màsala: contras a totu e a totus. Atacaiat sèmpere su chi, a parre suo, non torraiat cun sa lògica sua de poeta “italiota” chi posca si fiat cunvertidu a su sardu. Òmine contras e sìmbulu de una generatzione de intelletuales chi, coladu s’afuscu de sa modernizatzione farsa, fiat recuida a sa limba post-moderna. 





Sìmbulu finas de su disisperu chi si mudat in fele biende comente sa classe dirigente sarda pagu carculaiat, e pagu carculat oe in die puru, sa chistione de sa limba e de s’identidade natzionale sarda. Unu fele chi l’aiat custrintu de reghente a istare prus a sa sola chi in cumpangia. Betiosu e orgolliosu comente sèmpere est istadu. Contras finas a s’unificatzione de su sardu (?!), fortzis pro mustrare chi s’edade no li aiat proibidu de èssere “unu poeta contras” a mala bògia puru. 



Màsala est istadu, in su bene e in su male, sa màgine pretzisa de su movimentu sardu pro sa limba e sa natzione sarda de sa prima generatzione. Coràgiu, generosidade, ideas mannas, artes galanas, paràulas sonadoras e, peroe, finas sa pagu capassidade de tradùere in progetos cuncretos e fàtziles pro sa gente totu cussu iscusòrju poèticu e literàriu neosardista. Dificultade a istrinare istrumentos pro sa gherra fitiana de onni die a cadaunu. A fàghere poesia in sardu est bellu, ma non bastat pro trasmitere sa limba a sas generatziones imbenientes. 





Difatis, lassende a banda s’ipocrisia de cussos chi non l’ant mai amadu e oe l’atitant, pro nois s’òpera sua prus manna est cussa de àere iscritu su romanzu “S’istòria” publicadu a sa fine de sos Annos Otanta dae sa Alfa Editrice. Sa motivatzione est ca in cue b’est una de sas primas proas de sardu in prosa modernu artu, cultu, istandardizadu e regularizadu cantu bastat, chi at fatu de modellu a àteros puru. “Antonandria” de Pàulu Pillonca o “Sa gianna tancada” de Nanni Falconi, pro nde mentovare duos reghentes ebbia, a s’in capas non diant èssere mai naschidos chene cuddu. 



Dae cando fiat imbetzadu meda, e como ca si nch’est andadu, sos giornales non mancaiant mai de lu bantare e custu, naramus puru, si lu meressiat totu. Ma est beru chi sos giornales “italiotas” sardos l’aiant isdoganadu a ùrtimu cando s’atza de unu tempus si nche fiat abbrandada e fortzis non fiat prus un’artista gasi perigulosu pro su sistema regionale. Sa dogana e s’embargu culturale pro sa minoria linguìstica sunt passados a àtera gente e a àteros temas. Perigulosa fiat unu tempus sa poesia, oe a s’in capas, si timet de prus sa limba ufitziale giurìdica e s’imparu curricolarizadu in iscola. 



Est beru peroe chi oe nois podimus arrejonare e cumprèndere su chi bi capitat in Sardigna gràtzias finas a su traballu suo. E proite amus lègidu totu su chi at iscritu. E lu podimus criticare pròpiu ca b’est istadu unu Frantziscu Màsala chi nos imparadu a atragagiare. Pro custu meresset fama, onores, e gràtzias dae parte de ognunu de nois. Ma, si amus imparadu carchi cosa intendende-lu e legende su chi at iscritu, pensamus chi diat àere agradessidu non unu “coccodrillo” de làmbrigas lastimosas, ma un’arrejonu militante-polìticu-culturale de sardos non galu “bintos” e chi ischint impreare su cherveddu pro sighire sa batalla sua. Fortzis comente custu. 



O fortzis si nde fiat afutidu de su chi pensamus nois. Azigu pro sa realia acutza chi giughiat in corpus, azigu pro chi ogni artista, a manera pretzisa, pensat chi su mundu artìsticu suo siat su mèngius de su mundu. Ma, mi creo, chi a unu chi at a èssere immortale pro su chi at iscritu non deghet a èssere atitadu. 



Adiosu Frantziscu Màsala e iscusa si non semus resessidos a nos aunire a sas campanas lùghidas e sonantes de s’ipocrisia. Ti cherent interrare a corpos de carrasegare italiota. Mèngius su ferru acutzu, surdu e tostu de sos mamutones pro ammentare a tie. Pitiolos e sonàgios immortales comente a carchi òpera chi as creadu. Si custa est sa letzione tua…





Peppe Corongiu