Femmu meda preocupau candu nd’est arrutu su guvernu italianu, emmu nau “Porcacia de sa miseria, po crupa de cussu calloni de Mastella olis biri ca immoi D'Alema no acudit a fai sa caz... ehm, una cosa meda giusta? assumancu una! datu ca in dus annus ant acutu feti a poni a postu is contus e immoi arribat su nanettu a torrai a fai depidu...
Gei du frigas ainci a Massimeddu! Bastat a du fidai pagu pagu e castia ita ti fait, unu capulavoru! unu masterpicciu! S'arreconoscimentu de unu stadu nuo nou, su Kosovo!

Deu veramenti seu abarrau unu pogheddu meravigliau, me in is urtimus annus mi parriat unu pogheddu de manu-deretta, totu barca e Silviu! Castia a biri invecias 'ta omini democraticu! sensibili a su riconoscimentu de s'autodeterminatzioni de is minorantzias... afanculu a is lleis internatzionalis e ai cussus cagallonis de Serbus (d'iant a bolli una bella passada de bombardamentu comenti a una pariga de annus fait! berus D'Alema?), ma ita olint?
Bravissimu Massimu D'Alema! castia mi scusu, no ia apai mai pentzau chi tui fessist ainci acanta a is natzionis kentza istadu... anzis seu unu pogheddu disorientau poita funt de accurdiu puru is fascistas, Bush... boh! Adessi sa "svolta de Fiuggi"!?

Andat beni, andat beni! Ndi pigaus attu! Immoi non s'abarrat chi dichiarai unilateralmenti s'indipendentzia de sa Sardigna! No cumprendu ita meghit a aspettai Soru...! Ollu biri! Mi parit chi tengiaus tutus is paperis in regula, meda prus de su Kosovo, piticu territoriu de sa Serbia, de no crei! Diaberus sensibili D'Alema!
Nos semus su storicu Regnu de Sardigna! In cudd'ateru s'in ci anti fikiu una pariga de fanaticus casteddaius e sassaresus, illudius de Carlo Alberto...
Ma immoi, toca, seus ancora in su stadu de duxentuscinquantannus faint: andaus a sa stazioni e no ci funt is trenus, no c'est mancu prus sa ferrovia giai giai... dai, torraus a nos, immoi D'Alemeddu puru est masedu: caru Soru, proclamaus s'indipendentzia de sa Sardigna, toca convoca su consillu...

Funti finius is tempus de candu bastada a nai su fueddu "indipendentzia" e ti nc'acorranta in presoni... Custa puru no mi d'ant mai spiegada... Is leghistas, anti fatu, sciusciau, kistionant de "lotta armada", anti po fintzas fatu su "parlamentu padanu"... e nudda... Ki unu sardu s'atzardat a kistionai de indipendentzia, subitu in galera...! Ma immoi totu custu est finiu, c'est su Kosovo, e duncas de cras, puru sa Repubblica de Sardigna... as biu s'arregalu ki s'at fatu D'Alema?

Naturalmenti no depeus essi egoistas, immoi comenti apu iscrittu a bos ateros, iscriu puru a is cumpangius de Corsica, de Catalogna, de Euskadi, de s'Ulster, de Palestina, a is natzionis Cheyenne, Comanche, Blackfoot, Shoshone, Arapaho, Cherokee, Paiute, Sioux e a totus is ateras ki immoi ant a podi proclamai unilateralmenti s'indipendenzia... Fadei in pressi ca D'Alema s'arreconoscit luegu...!

S'unica cosa ki no apu ancora cumprendiu est poita at inghitzau cun su Kosovo... no d'us podit propriu biri is Serbus...! Est arrischiau puru paroa! Teniast a nos in domu... e ti nci andas in Kosovo, cun su perigulu de ci perdi is bafus e de scadenai una gherra... Toca Massimeddu, arreconosci a nos puru immoi, ainci Serbus e Russus si calmant... ca poi Bush at a reconosci tutu is istadus indianus e is comunistas no ant a podi prus kistionai...



(Massimo Pistis)