Su de ùndighi cumandamentos: FAGHE•TI IS FATOS TUOS!

Unu massaju tenet unu caddu istallone, ddi cheret bene comente chi esseret unu fìgiu. Una die, non s'ischit comente, s'animale non si cheret mòvere prus, imbrossinadu in terra sena fortza nen brios, semper drommidu. Lestru su massaju cramat su veterinàriu. Lòmpidu a campagna, su dutore vìsitat su caddu e porrende•ddi paritzas pastìllias cunsìgiat a su massaju: “ si dae inoghe a tres dies cun custas meighinas no at a sanare, mi dispraghet ma at a tocare a ddu ochire!”. Comente intendet sa paràula “ochire” unu porcheddutzu bellu grassu, amigu corale de su caddu, s'acùrtziat e l'abòghinat: “ma macu ses, a ti nde pesas!? Custos ti fusilant si non sanas, ma ite as?”. Su caddu pariat sufrire s'infadu de cussos cunsìgios: “ma ite ses narende, lassa•mi, non tèngio gana de fàghere nudda, so istracu de essire a sas festas, de cùrrere, non tèngio gana a beru!”. Fiat craru chi su caddu si nche fiat esaurende. S'incras, su massaju torrat fitianu a ddi dare sas meighinas, isperende de ddi fàghere profetu. Dende•bi•ddas sighiat a nàrrere a su caddu: “sana, non chèrgio a ti ochire, sena de te so disisperadu! ”. E su caddu nudda, semper firmu, mudu e a ogros tancados. Su porcheddutzu tando, aende in conca cuddu malaitu fusile, sighit a ddu pregare “pesa•ti•nde, custos ti ochint de a beru, deo ti chèrgio bene, non mi lasses!”. Su caddu nudda, antis, cumentzat a s'infadare e ddu catzat de mala manera: “bae, ca mi ses infadende cun custos arrèsonos!”, e abarrat corcadu e drommidu.
A sas tres dies, peruna meighina dd'aiat fatu nudda ca su caddu abarraiat disganidu, corcadu sena si mòvere, semper drommidu. Acudit su veterinàriu, intrat in domo de su massaju e detzidint de ddu ochire, ca non b'aiat àteru mèdiu de leare. Su porcheddutzu in foras fiat iscobiende e, cando bidet carrighende su fusile, curret lestru a sa de su caddu narende•ddi “non bi creias, no? Cussos duos ant giai su fusile in manu e sunt benende a t'isparare. Pesa•ti•nde, faghe•ddu pro s'amigàntzia nostra, nessi aberi sos ogros gasi as a cumprèndere ca non ti naro fàulas!”. Su caddu, prus pro si ddu catzare chi pro ddi pònnere mente, aberit un'ogru e bidet cuddos duos benende a fusile in manu. Lestru tando si nde ficat, e sanu che pische, cumentzat a innigros. Intrat su dutore, ddu visitat e decrarat: “ est sanadu, su caddu est sanadu!”. Su massaju si pesat a brincos pro sa cuntentesa. Narat a su dutore de si firmare a chenare, ca pro sa sanada de su caddu prus lestru e galanu de sa leada bi cheriat una festa manna. “Su duto', si firmet a chena: amus a festare!”. “Emmo, e ite manigamus, cosa bona?” pregontat su veterinàriu. “Ello - inditende s'amigu corale de su caddu - pro su caddu sanadu oe masello cuddu porcheddutzu grassu!”



Cristiano Becciu
Otieri