Duos cojuados noos tucant a “viaggio di nozze” a sa de sos donnos mannos. In una domo manna•manna in ue podent colare su tempus cun s'apentu de su praghere de sas carenas issoro, nèbidas....
Istant die e note amende•si e sena essire dae s'aposentu si non pro mandigare. 
Sa giaja, chi dae tempus meda aiat sessadu de giogare cun Eros, ca su maridu no bi resessiat mancu cun su viagra, si cuat in dae segus de sa ghenna pro iscobiare sos duos giòvanos: cheret ammentare sa brama de s'amore.
S'iscena chi bidet est custa: sa neta corcada in su letu, suta de unu lentolu, isetat su maridu. Su giòvanu s'acurtziat a su letu, artziat su lentolu e pregontat, gasi comente si faghet gioghende: “ e a ite ses nuda?”. Sa cojuada noa respondet cun boghe acisadora: “non so nuda, custu est su pigiama de s'Amore!”.
Pro more de cussa fràsia s'òmine cumentzat a dda carignare e sos duos si ponent a fàghere cussu cumandu chi tocat de acumprire. 
Sa giaja restat ispantada bidende•ddos. Ma pensat finas de àere imparadu una cosa noa: cussu “pigiama de s'Amore” podiat èssere su mèdiu pro torrare a bida sa brama de su maridu.
Recuit a domo. S'ispògiat, si nch'intrat suta de su lentolu de seda e abarrat chi torret su maridu. 
Su tziu intrat tzopighende in s'aposentu de letu, arrumbat su bàculu in unu cugiolu, àrtziat su lentolu e bidet sa mugere gasi comente sa mama l'aiat fata e comente su Tempus l'aiat mudada e narat: “Como fiat dae meda chi non ti bidia nuda!”. 
E sa tziedda, in chirca de desìgios e ammentende sa fràsia de sa neta: 
“non so nuda, custu est su pigiama de s'Amore!”. 
Su maridu tando respondet: 
“de acordu, ma nessi una prantzadedda bi dda podias dare a custu pigiama......!”.

Cristiano Becciu - Otieri