S'Institut d'Estudis Catalans at presentadu in fines su "Diccionari" de sa limba catalana. A pustis de 10 annos de traballos, su "DIEC" est istadu fatu connòschere carchi die como in Barcelona
in un'adòbiu cun s'imprenta in sa sea de s'acadèmia de sa limba de su Printzipadu. Sunt istados giai ispainados 30 mìgia volùmines de un'òpera chi lòmpet posca cussa de su 1995 cando sa essida de su primu Ditzionàriu aiat pesadu in totu sa Catalùnia cuntierras e tzarras. Sos professores de s'IEC como sunt giai traballende a sa Gramàtica ufitziale chi diant dèpere bogare, pro cuntratu, intre su 2009. Segundu su chi at ispricadu Joan Martí Castell presidente de sa setzione filològica, in cunforma a s'òpera de a in antis si sunt postas in contu 11.500 propostas de mudamentu e de custas sa metade nessi sunt istadas acollidas. Su primu "Dicionari" l'aiat fatu Pompeu Fabra, su babbu mannu de sa limba catalana, in sos annos trinta de su sèculu coladu. Imputadu dae sos acadèmicos ispagnolos proite no aiat fatu istùdios clàssicos e ca fiat un'ingegneri, isse at dadu una letzione a su mundu. Cun s'ùrtima editzione de su ditzionàriu sos catalanos tenent unu istrumentu iscientìficu in prus pro afortigare sa limba issoro. 


fonte de s'artìculu e de sa foto su diàriu Avui