<Semus una natzione e cherimus su cantu nostru de soberania>. L'at nadu Renato Soru s'àtera die faeddende in Sa Festa Manna de sos indipendentistas de s'IRS in ocasione de una mesa de arrejonu cun natzionalitàrios de Còrsica, Euscadi e Catalùnia. Su presidente de sa Regione at tratadu s'argumentu de sa cuntierra cun s'Istadu italianu chi cheret deburrare sa paràula "soberania" dae su testu de lege chi cunsentint de formare una Cunsulta pro iscrìere s'Istatutu Sardu Nou. <Non nos agradat a faeddare de situatziones violentas comente su Montenegro, e non semus nemancu comente sos catalanos. Sa lìnia nostra no est indipendentista, ma cherimus afortiare un'interpretatzione de su cuntzetu de "soberania" chi, a bisu nostru, podet èssere cumpartzida dae Istadu e Regione>.