S’Istrumpa, s’antiga luta de sa Sardigna, e sos gherradores sardos sunt torrados a s’atobiare cun is àteras natziones de su continente europeu in sa manifestatzione “Juntos” in Biddamanna. Apustis de su campionadu europeu fatu in Ollolai in su 2003 contra Iscotzesos, Inglesos, Gallesos, Brètones, Castillanos, Austrìacos e Olandesos, sos gherradores istranzos de Iscòtzia e de Inghilterra ant chèrfiu torra gherrare sa Back Hold, s’istrumpa issoro, contra sos sardos in un’atobiu de amistade, alligria e festa. Presente finas William Baxter, Presidente de sa Federatzione Internatzionale de sas lutas Cèlticas in ue b'at finas sa Federatzione s?istrumpa, sèmpere bestidu cun su kilt, su costùmene iscotzesu.Totu custu est capitadu su 19 de Agustu in sa pratza Sennorigau de Biddamanna a printzipiare dae sas ses de merie finas a note tardu. A su mangianu intames s’est presentada s’initziativa fata cun s’agiudu de s’assessoradu de sa publica istrutzione de sa Regione Sardigna, de sa Provìntzia de s’Ogiastra, de su Comune de Biddamanna, de sa Federatzione s’Istrumpa, de su Sòtziu sa Strumpa, de su grupu folk S. Barbara, de su Sòtziu Amistade, de su Sòtziu Praidas Trekking.